Ich brueder Geörg Kremüzer, der zeit prior, und wir, der ganze convent Sanct Augustins closter zu Kornneuburg, bekhennen für unns unnd^a alle unnser nachkhommen unnd thuen kundt offentlich mit dem brief allen, den er fürkhombt, daß wir mit guetem willen unnd wolbedachtem mueth, mit^b veraintem rath, zu der zeit, da wir es mit sonderm gunst unnd bewilligung des würdigen unnd geistlichen vatter provincial wol thuen mochten^c, verkhaufft haben vier pfundt pfenning gellts burckhrecht jährlicher güllt auf unnserm heußlein gelegen zu Closterneuburg, zu nächst der schuel mit ainem thail etc. Die vorbestimpten vier pfundt pfenning gellts burckhrecht güllt haben wir auf vorangezaigtem unnserm heußlein recht unnd redlich verkhaufft unnd geben umb achzig pfund pfenning gueter landtswehrung in Osterreich, die wir berait eingenommen haben unnd in unnsers gottshauß nuz unnd notturfften gewendet unnd angelegt haben, dem würdigen unnd geistlichen vatter brueder Ambrosy Stockher² prior unnd dem convent gemain des closters Sanct Augustins orden zu Baden unnd iren nachkhommen fürbaß die benannt burgkhrecht gült auf dem benannten unnserm haußlein lediglichen unnd freylichen zu haben, zu nuzen, zu nießen alls annder güllt, die zu demselben irem closter gehören, in solcher mainung, daß wir, unnsere nachkommen unnd alle, die das gemellte unnser heußlein innhaben und besizen, ihn die vorbestimpten vier pfundt pfenning burckhrecht güllt jährlichen davon raichen unnd dienen sollen, und wollen aines ieden jahrs miteinander allweeg auf sanct Michaels tag, unnd mit der nächsten güllt zu dienen anheben zu sanct Michaels tag^d schirist künfftig, mit allen den nuzen unnd rechten, alls man annder burckhrecht güllt pflegt zu dienen. Unnd wan die güllt unnd dienst verseßen werden, allsdan mögen sie auff das obbestimpt unser heußl vor unnserm ordenlichen richter clagen zu vierzehen tagen, alls umb verseßen burckhrecht güllt grundts unnd landts in Österreich recht ist. Es seind auch dieselben vier pfundt pfenning burckhrecht güllt widerumb abzukauffen unnd abzuledigen, wan wir das gethuen mögen oder wöllen, aines ieden jahrs mitainander mit achzig pfundt pfenning obbemellter landtswehrung unnd den nechsten zinß damit, so deßelben jahrs davon zu dienen gefellt ohn allen krieg, welcher ablösung sie uns dan ohne widerred statt thuen unnd zu loßen geben sollen. Unnd sein auch wir vorgenannt prior unnd convent Sanct Augustins closter zu Kornneuburg mit sampt allen unnsern nachkhommen unverschaidenlich der ehegenannten burckhrecht güllt auf dem obenangezaigtem unserm heußlein dem benanten prior unnd convent zu Baden unnd iren nachkhommen rechte gewehren unnd schermb für alle ansprach alls burckhrechts, grundts unnd landts in Osterreich recht ist. Gieng in aber daran icht ab oder ob das heußl durch brunst oder in ander weeg in unfall keme unnd solche burckhrecht güllt nicht mehr ertragen möchte, denselbigen abgang sollen sie haben unnd bekhommen zu unns unnd unnseren nachkhommen unnd besonder auf unnserm weingarthen genannt Geyßlher, den wir inen hiemit auch verpfendten wöllen, wir sein lebendig oder todt, alles getreulich unnd ohngefehrlich. Mit urkhund des briefs, besieglet mit des würdigen vater provincial unnd unnser, obbemelten prior unnd convent daselbst zu Kornneuburg, anhangenden insigeln. Auch haben wir erbetten zu mehrer urkhund brueder Achatien Clauß die zeit prior zu Wien³, unnd brueder Steffan Mair, prior zu Pruckh, daß sie auch ire insigel daran haben gehangen, doch ihn unnd iren conventen ohn schaden. Geben zu Wien am sontag vor der Heiligen Drey Konig tag, nach Christi geburth tausent fünfhundert und im drey und zwainzigisten jahre.

Source Fulltext: MAURER, Augustiner-Eremiten Baden (=FRA II/89, Wien 1998) S. 267-269.