Wir Ferdinand etc. embieten unnserm getrewen lieben Sebastian Hofer, unnserm saltzambtman zu Gmunden, und sunst allen unnsern mautnern, aufslegern und zollnern, so hiemit ersuecht werden, unnser gnad und alles guets. Nachdem weilland unnser lieber herr und anherr kaiser Maximilian etc. hochlöblicher gedechtnus den erbern geistlichen unnsern andechtigen N. prior und convent augustiner ordens in unnser stat zu Paden zu ir unnderhalltung jarlichen ain mal bey unnsern saltzsieden zu der Halstat und daselbst umb bey Gmunden bis zu vier oder funff schilling fueder saltz zu sameln und herab gen Paden mautfrey zu fueren bis auf widerrueff vergundt und erlaubt hat, darauf emphelhen wir euch allen und jedem in sonnderhait, daz ir die berurten closterleut solch antzall saltz dits gegenwärtig XXiiii^ten jars, die berurt antzal saltz, so sie wie vorsteet, der ennden sameln und herabfueren werden, mautfrey und an all annder beswarung passirn lasset und inen darinn khain irrung duet. Das ist unnser maynung. Geben am XV^ten tag Februarii anno etc. im XXiiii^ten.

Source Fulltext: MAURER, Augustiner-Eremiten Baden (=FRA II/89, Wien 1998) S. 269.