Allerdurchleuchtigister, großmöchtigister khunig, unnser allergenedigister erbherr unnd lanndsfurst! Eur khu. mt. geben wir in aller unnderthenigister geharsam genedigelich zu vernemben, das unns in verrukhter zeit von eur khunigelichen mt. auf unnser sonnder diemuetigs anlangen und unnderthenigs bittn von wegen des augustinercloster hie zu Padn, so derselben zeit an ainigen conventualbrueder gelassen und zu frembter hanndt gelegen, obe unns dieselbig closster stifft und wirdtschafft sambt irem einkhumben zu unnserm armben burgerspital genedigelich vergunt und zuegeaigent macht werden², diser eingelegter genedigister beschaidt ervolgt³, auch eur khu. mt. deßhalben an herrn provincial gemelts ieres ordens laut glaubwirdiger abgschrifft bevelh ausgeen lassen⁴, des wir unns dan gegen eur khu. mt. etc., unnserm allergenedigisten herrn, in aller diemuetiger schuldiger geharsam und höchstem muglichen vleiß bedangkhen, das eur khu. mt. in disen und anndern fälln unnser und des armben ungestifften spitals unvermugen und hoch verdärben so genedigist bedacht und väterlich zu hertzen genumen. Weil aber, allergroßmähtigister, genedigister khunig, die ersetzung beruerter ordenßleut, darauf dan die stifftung und fundacion geschehen, durch den herrn provincial ernents ieres ordens bis anheer der notturfft nach vermug e. khu. mt. ausgeganngen bevelh nie voltzogen oder nachgelebt worden, dardurh dan warlich zuvorderist der löblich gotzdiennst unnd stifft schlechtlich versorgt und zum tail unausgericht bisheer beliben, auch das heillig götlich wort etlich jar herumb nie verkhundt noch gepredigt worden, sannder die angetzaigt closster stifft sambt der wirdtschafft durch unwirdlichkait des yetzigen eingesetztn priors ye lennger ye mer in abfaal und verdörben gedeien thuet, wie dan er prior etlich ansehenlich stukh guldt und einkhumen, darauf die fundacion gestelt, von gemeltem closter ungeverlich nuer in ainem jar mit seiner haußhallttung verkaufft sambt dem, das er die weingartn und annder anligenndt grundt, daran die unnderhalt und narung berurter ordenßleut steet und genumen werden mueß, in abpaw khumben lässt und in die lenng gantz und gar verödt werden mochten, demnah aus obertzellten warhafftigen ursachen und eur khu. mt. ausgeganngen bevelh nach so bitten und ermonen wir eur khu. mt., unnsern allergenedigisten herrn, nochmals durch Gottes willen in aller unndertheniger geharsam, eur khu. mt. geruehe unns und unnserm armben ungestifften spital so genedig ze sein und die gemelt closster stifft wirdtschafft sambt ierem einkhumen dem armben unnserm spital vörderlichen zue aignen und genedigelichen vergunen, davon dan in Got will angerurter gatzdiennst und die angetzaigt stifft pessers und mörers ausgericht und das uberig einkhumen den armben durfftigen khrangkhen personnen zu der unnderhalt – in dem wir doch eur khu. mt. in nichtes khein ordtnung setzn, allain was eur khu. mt. aus khunigelicher angeporner barmbhertziger milltigkait bewilligt, ervolgt und auferlegt wirdet – also fideliter und an ainigen aigen nutz gewenndt und angelegt werden solle. Daran wird e. khu. mt. unnserm armben spital ain allmuesen und sonnder werh der barmbhertzigkait bewisen haben und darumben die belonung bey dem allmohtigen Got ungetzweiffeldt emphahen. Wir wellen auch umb eur khu. mt. väterliche gnadt und bewißne pietantz ewig dangkhper sein und gegen e. khu. mt., unnserm allergenedigisten herrn und lanndtßfursten sambt derselben geliebten khunigelichen khinder langkh leben und gluckhsellige regierung gegen Got zu bitten als die armben geharsamen unnderthennen aus schuldiger phlicht und unnderthenigkait nimermer aufhören. Thuen uns hiemit e. khu. mt. in diemuetiger unndertheniger geharsam bevelhen, e. khu. mt. Unnderthenige und geharsame N. richter, rat und die armb gemain zu Paden.

Source Fulltext: MAURER, Augustiner-Eremiten Baden (=FRA II/89, Wien 1998) S. 306-307.