Die regierung haben dise der von Paden supplication sambt dem, was vorausganngen ist und waran diser zeit die sachen geruet, ubersehen. Und dieweill unnder annderm daraus verstannden wirdt, das der provincial den bericht, wie ime durch der khu. mt. etc. bevelh noch im xxxvii^tenjar auferlegt¹, bisheer nit gethan hat, so wäre demnach ier der regierung unnderthenigist guetbedungkhen, die khu. mt. hiet erwentem provincial nochmallen und zu ainem uberfluß ernstlichen bevolhen, angetzaigtem bericht laut vorausgeganngen bevelh mit dem fuederlichisten zu thain, und sover er solhen bericht in bestimbter zeit nit thät oder denselben ubergäb und darinnen befunden wurde, das die antzal der conventbrueder nit erhallten werden möcht, wie dan die regierung gleichwol fursorg tregt, das es in gegenwurtigen manngl der religionpersonen nit beschehen mag, so wolte die regierung nit widerraten, die khu. mt. het dennen von Paden das beruert closter sambt desselben zuegehorung und einkhumben zu ainem spital und unnderhallttung der armben leut allergenedigist gegeben und volgen lassen. Actum Wien, den xxii. tag Decembris anno etc. im xxxviiii^ten.

Source Fulltext: MAURER, Augustiner-Eremiten Baden (=FRA II/89, Wien 1998) S. 308-309.