Ich brueder Quirinus Riedmayr, augustiner ordens prior zu Baden, bekhenn für mich, meine nachkhommen unnd anstatt des ganzen convents daselbst gegen allermeniglich in diesem offenen brief, wem der fürkhombt, nachdem in verschienen jahren durch weiland Wolffgangen Premb¹, derselben zeit prior, unnd N. convent daselbst zue Baden die behausung zu Baden am vischmarckht², zwischen Georgen Praunswedels^a hauß³, so von gemellten closterleuthen leibgedingt ist, und Wolffgangen Drosendorffers seeligen, etwo burgers zue Baden, gelaßner behausung⁴ gelegen, sambt einem höfel, so von obberürtem hauß neben unnd für des Khreuspeckhen oder Gottsleichnambs capellen in das eckh unnd von dannen biß für des closters schenckhstuben unnd einfarth gehet, auf den erbaren weisen Hannsen Drosendorffer, burgern zue Baden, unnd noch auf drey leib, so aber nun mit todt verschaiden⁵, innhallt brieflicher urkhund umb zwainzig schilling pfenning jährlicher güllt gueter österreichischer gehiger münz zu rechtem leibgeding verlaßen gewesst, welches hauß auch durch die vorernennten innhaber des verlaßnen leibgedings noch ain gaden hoch dem anndern anrainenden hauß gleich aufgeführt unnd zu zwayen maln aus gefehrlichkheit der kriegsleuf auferbaut worden, daß ich demnach für mich selbst unnd in namen des ganzen convents aus bemelltes closters anligender noth und getrungner armuth unnd sonnderlich zue einbringung unnd vechsung des weinlesens dieses lauffenden neun unnd dreißigisten jahrs mit wolbedachtem muth, recht und redlich, da ich das ohne allermeniglichs irrung unnd widersprechen, zuvorderist mit bewilligung unnd zugebung des obristen unnsers ordens provincials in Österreich etc., vatter Johann Vilßhover⁶, der zeit prior zue Wien, rechtlich macht zu thuen hette, eines stathen, aufgerichten unnd unwiderrueflichen ewigen kaufs hingeben unnd verkhaufft han^b‚ hingib und verkauff auch hiemit wißentlich in crafft dits briefs dem gedachten Hannsen Drosendorffer und Rosina seiner haußfrawen, auch iren baiden erben⁷, die angezaigt behausung sambt dem höfel unnd einfarth des vorgewesenen ernennten leibgedings, davon man dan nun jährlich den gemellten closterleuthen zue sanct Michaels tag zue rechtem grundtdienst dienstbar ist acht unnd zwainzig pfenning unnd nit mehr, mit allen den ehren, würden, nuzen unnd rechten, alls das closter daßelbig inngehabt, genuzt unnd genoßen, auch wie die chonleuth unnd ire erben darumben nuz unnd gewehr empfangen haben, umb ain summa gellts, benantlichen fünf unnd siebenzig pfundt pfenning, der ich anstatt des gottshauß zue anlegung der oberzehlten nottdurfften ganz unnd gar zu rechter zeit in gueter landleuffiger münz ohn abgang unnd allen schaden entricht unnd bezahlt bin, darauf ich unnd anstatt des ganzen convents den gedachten conleuthen unnd iren erben das obberüert hauß sambt dem hoff unnd einfarth des vorgewesenen leibgedings aus mein unnd meiner nachkhommen in ir und^c irer erben gewallt, nuz unnd gewehr ubergeben, abtretten unnd eingeantworth in ganzer redlicher verzicht, allso daß sie unnd ir beeder erben sollen unnd mögen nun hinfüro das ehegenannt hauß mit sambt aller seiner rechtlichen ein- unnd zugehörungen innhaben, nuzen, genießen unnd gebrauchen, auch verrer damit alls mit annderm ihrem erkaufften unnd aigenhafften guet allen iren nuzen unnd frommen betrachten, es sey mit verkauffen, versezen, machen unnd geben, wemb sie wollen unnd sonst alles damit handlen, thuen unnd laßen nach irem gefallen ohn mein unnd des convents, auch derselben nachkhommen unnd allermeniglichs von gemelltes closters wegen irrung, hindernus unnd widersprechen. Ich gelobe auch unnd versprich für mich, meine nachkhommen unnd anstatt des ganzen convents hiemit in crafft dieses khauff- unnd schermbriefs des vorbenannten hauß unnd seiner ernennten zugehörungen obbestimpten Hannsen Drosendorffers unnd seiner haußfrawen Rosina, auch aller irer erben recht gewehr, schermb unnd fürstand zu sein für alle rechtlich ansprach, wie offt unnd an wellcher statt inen das von meinent unnd des ganzen convents wegen der obberüerten erkhaufften behausung halben noth beschicht, alls sollches kauffs, grundrechts unnd des landts Österreich recht, sitt unnd gewohnheit ist. Gieng inen aber oder ihren erben icht an der berürten gewehrschafft ab oder aber deßhalben ainigerley krieg oder ansprach daran auferstünde, von wemb das wäre, wie sich das zutragen unnd begeben möcht mit recht, des sie oder ire erben schaden empfiengen, wie der genennt, ungevehrlich, denselben schaden allen unnd ieden zusambt der hauptsumma gelobe ich für mich unnd anstatt des ganzen convents, auch unnserer nachkhommen, inen unnd iren erben gar unnd gänzlich auszurichten, abzulegen unnd widerzukheren, auch ohn allen schaden richtig zu machen. Sie oder ire erben mögen auch das alles suchen, haben unnd bekhommen auf allen unnd jedlichen des obbemellten gottshauß anligenden unnd fahrenden haab unnd gütern, wo die gelegen sein, nindert noch gar nichts besonndert oder ausgeschloßen, unzt sie ganz vergnüegt unnd ohn all iren schaden wol zufrieden gestellt sein. Zudem ist auch mit nachfolgender ausgenomener beschaidenheit aigentlich beredt, wofer die offternennten conleuth oder ire erben das gemellt abgelöst unnd erkhaufft leibgedinghauß sambt seiner angezaigten zugehörungen widerumben verkhauffen wollten, daß solches den closterleuthen in alle weeg vor allen anndern wider angefailt werde. Wo ihnen aber sollcher kauf nicht gefellig, mögen die conleuth innhallt dieses kaufbriefs, wie sie verlust, damit handlen. Verner ist auch in angezaigtem kauf gemacht unnd endlich beschloßen, daß die fenster, so aus der schenckhstuben und weinkeller in den hoff gehen, wie die dieser zeit vor augen seind, beleiben sollen, allain daß dieselbigen durch den prior nottürfftiglich verstangt werden. Die bemellten conleuth mögen auch zwischen der ernennten capellen unnd schenckhstuben ain preßhaus aufbawen, doch daß durch sollches baw der capellen das liecht verrer nit genommen, sonder wie es derselben zeit in verkhauffung des leibgedings erfunden, unvermacht bleibe, alles treulich unnd ungefehrlich. Zu wahrem urkhund unnd glauben hab ich obgedachter Quirinus Riedmair prior diesen kauf- unnd schermbrief mit meines priorats anhangendem insigel bewahrt, unnd zu mehrer bestendiger bekrefftigung dieser sachen ist gleicher weiß durch den obgemellten herrn provincial vatter Johann Vilßhover das Padner conventual insigel, so er dieser zeit bey seinen handen gehabt, auch hieneben angehangen unnd verfertigt. Darunder ich mich unnd anstatt des ganzen convents auch unnserer nachkommen alles unnd jedes, wie oben nach lengs gehort war, stät unnd unzerbrochenlich zu hallten verbinden thue. Beschehen zu Baden am montag nach sanct Michaels tag, nach Christi unnsers hailandts geburth fünfzehenhundert unnd im neun und dreißigisten jahr.

Source Fulltext: MAURER, Augustiner-Eremiten Baden (=FRA II/89, Wien 1998) S. 302-305.