Wier, Quirinus prior² und der gantz convent des closters sant Augustin orden zw Paden, bekhennen fur uns und unser nachkhomen, das wier recht und redlich verkhauft haben, und thun das auch hiemit in craft ditz brieffs wissentlich, unser haus mit seiner gepurlichen hofmarch, zw Sant Peltn in der stat gelegen, gedachtem unserm gotshause zuegehorig, den erwirdigen geistlichen herrn Martin brobst, Wolfgang dechant und gantzem convent des wirdigen gotshaus daselbst zw Sant Poltn und iren nachkhomen umb ain suma gelts, daran wier und unser nachkhomen yetz und hinfuran alltzait gantz beniegig sein solln und welln, der wier auch on abgang also par entricht und betzalt sein. Hierauf sollen und migen sy nun gedacht haus von uns und menigelich von unsern wegen ungeirt berueblich inhaben und gebrauchen, damit handeln, thun und lassen mit stiften, verkhauffen oder in ander weg des gevallens, wie inne das furtraglich oder gelegen sein will oder mag, wan wier uns desselben hiemit gantzlich vertzigen haben wollen, hinfuran dartzue weitter nichts ze sprechen in khain weg. Wier, obbenent prior, convent und unser nachkhomen zw Paden, sein auch der gedachten herrn probst, dechant und convents zw Sant Peltn zu aufrichtigen khauf umb angetzaigt haus recht gwer, scherm und furstandt für all rechtlich khrieg und anspruch, als oft inne dar mit recht not geschiecht, sy und das gotshaus hierin gegen menigelich zu verantworten, on schaden und nachtail ze halten, der wier uns hiemit pey dem gewondlichen schadenpunt des lands Osterreich verpunden haben wollen. Wo inne aber hierin ainicherlay schaden rechtlich zuegefuegt wurde, den versprechen wier hiemit fur uns und unser nachkhomen, inne abzulegen und das ermelt ir erkhauft und betzalt behaust guet ine an ir mue und schaden richtig zw machen, das sy haben und bekhennen sollen und mogen zw uns und unsern nachkhomen, biß auf ir guet völlig beniegen treulich und ongevarde. Zw urkhundt haben wier, obgedacht prior und convent, unser aigne insigl an disen brief gehangen, der geben ist am 29ten tag des monats September im 1538ten jar.

Source Fulltext: MAURER, Augustiner-Eremiten Baden (=FRA II/89, Wien 1998) S. 299-300.