G. etc. herrn, auf e.g. hiebeyligunden gegebnen ratschlag das einkhumben augustinercloster zu Paden, des e.g. ain wissen zu haben begern, belanngunndt. Nachdem wir verschiner zeit in bereittung und hanndlunng der geistlichen visitation zu Paden gewesen unnd bey jezigem herrn prior, brueder Quirin, des closter einkhumben und ausgeben vermug unnser habunnden khunigelichen innstruction erkhunndigunng gehallten, darauf unns durch gedachten prior ain verzaichnuß des closters emphanng und ausgab sambt desselben schullden diser zeit noch verhannden, die gleichwoll zum thaill ains unrichtig gewesen, furgelegt worden. Damit wir aber nit verhindert wurden, haben wir dieselb ordennlich, wie dann e.g. ab hiebeyligunndt abzunemben haben, stellen lassen, die wir hiemit auf e.g. bevelch uberannttwortten. Was aber von dem closter verkhaufft unnd verkhumert worden, haben wir unns nit erinndern noch jetziger prior desselben unns anzuzaigen wissen.

Source Fulltext: MAURER, Augustiner-Eremiten Baden (=FRA II/89, Wien 1998) S. 317.