Römischer küniglicher mayestät unnsers allergnedigsten herrn lobliche statthallter, canzler unnd regenten der Niderösterreichischen landen, hochwürdige^a, wolgeborn, gestreng, hochgelerth, edl, vesst, gnedige herrn! Ewer gnaden bitt ich in aller underthenigkheit, die geruhen in gnaden zu vernemen, daß ich in visitation meines ordens clöster durch den prior zu Baden erindert, wie daß sich richter unnd rath der statt daselbst understehen, in deßelben unnsers closters güeter etliche eingriff zu thuen. Erstlich haben sich bemellte richter unnd rath aines garten, so von allters her zu demselben unnserm closter gehört, gewaltthetiger weiß understanden, unnd wiewol sie derhalb der gedacht unnser prior solchen garthen güetlich ersucht, solches ires fürnemblichen handlen^b‚ dieweil meniglich der gorthen bewüsst zu demselben unserm closter gehört, abzustehen unnd ime daran ferner kein irrung noch eingriff zu thuen, auch darauf gedachter prior für solche garthen thür ainen steckhen geschlagen, welchen die von Baden mit gewallt auszogen, umb^c ine durch solche ire gewaltthetige innhabung, darumben sie ainig (sic!) titl oder gerechtigkheit fürzubringen oder anzuzaigen haben, ain possession zu schöpfen. Zum andern understehen sich auch die burgerschafft zu Baden, etliche grund unnd güeter, darüber ain prior grundtherr unnd in derselben grundtbuech zu fertigen, auch jährliche grundtdienst davon zu raichen schuldig, dieselben außerhalb des priors alls grundtherrn zu verkhauffen unnd verkhummern, allso daß derselben güter nun etliche an der dritten hand sein, auch von etlichen gütern dem prior bißher in viel jahren khain dienst geraicht worden, unnd wogleich der prior solcher beschwär halber richter unnd rath ersucht, kain ausrichtung derhalben erlangen mögen. Langt dem allen nach an ewer gnaden mein gehorsamb anruefen unnd bitt, die wollen ernennten richter unnd rath zu Baden mit ernst auflegen unnd befehlen, ernanntem unnserm priorn solchen garten, so zu unnserm closter daselbst gehört, des sie im also gewaltiger weiß entwendt unnd entsezt, gnedig abstehen unnd folgen laßen unnd bei allen unnd jeden iren burgern, so hauser, weingarthen oder anndere güter haben, so bey demselben unnsers ordens prior alls grundtherrn zu [S. 318] fertigen unnd dienst schuldig sein, darob sein unnd verfüegen, damit die gewehr bey unnserm prior alls grundherrn, wie sich gebüert, ersuechen, empfahen unnd die ausständigen, auch füran jahrlichen grundtdienst, wie sich gebüret, raichen unnd geben. Darumb^d, ewer gnaden, will ich sambt ermelltem prior mit unnserem gebett gegen Gott zu bitten in ewig nit underlaßen. Ewer gnaden undertheniger Jacobus Schott.

Source Fulltext: MAURER, Augustiner-Eremiten Baden (=FRA II/89, Wien 1998) S. 318-319.