Ehrwürdiger, geistlicher, sonders lieber herr provincial! Nach verwilligung oder erbietung unnser willigen dienst fügen wir ewer ehrwürden zu vernemen, daß unns in diesen tagen von der hochlöblichen königlichen regierung ain commission zukhommen, die wir in gebürlicher unnd schuldiger reverenz empfangen, darinnen unns den ihr mayestät auferlegen unnd befehlen, von wegen des augustinerclosters handlung fürzunemen. Derhalben wir zu solcher commissionshandlung den erichtag nach dem palmtag, welcher ist der lezt gegenwürtiges monats Martii, diß laufenden 45. jahrs umb die sechste stundt zu früer tagzeit bey ainander zu Baden zu sein erkhiest unnd fürgenommen. Welchen ausgesezten tag unnd malstatt wir ewer ehrwürden auß befelch unnd gehaiß unnser gnedigen herrn der Niderösterreichischen regierung in namen der küniglichen mayestät verkhünden, ob ir dabey sein oder iemand an ewer statt schickhen wollet. Dan ir selbst oder ewer bevelch- unnd gewallthaber erscheinen also auf diesen gesezten tag oder nit, so wollen wir doch ewer ehrwürden unverhallten, daß nichts minder die künigliche commission durch unns gehorsamblich vollzogen unnd nachgelebt würdet. Darnach wißen sich ewer ehrwürden zu richten, unnd unns alle in Gottes gnaden befehlend. Actum Wien, dem sambstag vor Iudica in der fasten, anno 45.

Source Fulltext: MAURER, Augustiner-Eremiten Baden (=FRA II/89, Wien 1998) S. 346-347.