Ferdinand von Gottes genaden Römischer, zu Hungern und Böhaimb könig. Getrewe liebe! Alls wir iezo unnsern getrewen lieben N. richter unnd rath unser statt Baden auf ihr underthenig ansuechen unnd bitten, auch aus begründten, gueten unns darzue bewegenden ursachen das unersezt öd closter augustiner ordens daselbst zu Baden sambt deßelben ein- und zugehörungen zu irem newen spital gnediglich bewilligt unnd gewidmet haben - doch mit der condition, wo sich uber kurz oder lang zutragen wurde, daß wir oder der provincial berürtes augustiner ordens angezaigt closter mit ordens personen widerumb ersezen wolten, daß sie unns daßelbe closter mit allen seinen zugehörungen, güetern, gründten unnd einkhommen gegen erstattung unnd bezahlung ires darleyens unnd beßerung, so sie in zeit irer innhabung daran gelegt unnd gethon haben möchten, wie sich die in notturfftiger beschau unnd gebürlicher betheurung zu derselben zeit befinden wurde, ohn ainige waigerung oder ausflucht widerumb abzutretten unnd einzuantworthen schuldig sein sollen - derhalben die notturfft erfordern will, daß sollch closter mit deßelben ein- und zugehörigen kirchengezierden, klainotern, stucken, güllten, güetern unnd gründten, ehe und zuvor daßelb inen, denen von Baden, eingeantwort unnd zugestellt werde, aigentlich besichtiget und geschäzt, inventiert unnd beschriben werde, auf daß man uber kurz oder lang ain gründliches wissen gehaben mög, ob unnd umb wie viel das vorgemellt closter mit seiner zugehörung durch die ehegedachte von Baden gebeßert oder geringert worden unnd allsdan darauf ferrer der gelegenheit nach der sachen die gebür gehandlet werden mög; zu welcher besichtigung, schazung unnd inventirung angerüerter^a klainoth, stuckh, güllt unnd güeter wir euch zu commissarien fürgenommen unnd verordnet haben unnd befehlen euch darauf unnd wollen, daß ihr euch dieser commission und^b handlung gehorsamblich annemet unnd beladet, euch mitainander aines gelegsamben, fürderlichen tags vergleichet, denselben baiden thailen alls dem provincialn, in abwesen seinem verwallter oder N. dem prior berürtes augustiner ordens allhie zu Wienn, unnd denen von Baden zeitlich verkhünden sollet, ob sie darbey sein oder iemandts an ihr statt schickhen wollten, sich darnach (...)^c zu richten verkhündet unnd – sie erscheinen durch sich selbst oder ire bevelchaber auf denselben oder nit – nichts minder zue besichtigung unnd betheurung der cleinoth unndt fahrenden haab des closters, seiner gebew, zimmer, wohnungen, gewölb, keller, tachwerckh unnd annders verständig unnd die geschworne goltschmidt unnd anndern werckhleuth unnd zu besichtigung unnd schazung der grundt, güllt, güter unnd weingarthen die perckhmaister, richter, vierer oder anndere personen, so an ainem ieden orth die geschwornen unnd verordnete sein, zu euch beschaidet unnd erfordert unnd anfangs die kirchenkleinodt, vahrend haab sambt dem bemelltem closter mit allen seinen gebewen unnd wohnungen, nachmaln ainen ieden weingarthen unnd grund alls wisen, garthen, ackher, hölzer unnd all andere güllt unnd güeter darzue gehörig mit und sambt den bemelten goltschmidten, werckhleuthen, perckhmeistern unnd geschwornen schazleuthen insonderheit mit allem vleiß besichtiget, nach erbarn, zimblichen dingen schazet, anschlaget unnd betheuret, was ain iedes insonderheit iezo billichen werth sein möge, unnd dan ain iedes stuckh insonderheit, es sey ligend oder fahrend, mit seinem namen, rain und stain, pigmerckhen unnd fürnemblichen mit dem werth, wie ir das iezo in öden oder in baw befinden unnd schazen werdet, underschiedlich in ain ordenlichen unnd glaubwürdigen inventari stellet, verfaßet unnd begreiffet, also unnd dergestallt, wan es sich künfftig zutragen sollt, daß die genannten von Baden sollches closter widerumb abtretten sollten, daß man aus sollcher underschiedlicher schazung unnd inventari begriff unnd verfaßung lauter verstehen und abnemen möge, in was werth ain iedes stuckh oder guet in gemellter von Baden gewaltsam kommen unnd was folgend durch sie daran gebeßert worden sey oder nit, solches inventari mit ewern insigln oder petschafften, auch undergestellten handtschrifften verfertiget, unserer regierung unnd camer unserer Niderösterreichischen landen verpetschiert ubersendet unnd ihnen solche stuckh, güllt unnd güter nach laut deßelben inventarii von stundt an zustellet unnd einantworthet, auch sollches alles in ansehung, daß große zeit ist, die weingarthen zu schneiden und mit annderer folgender arbeit an die hand zu nemen, fürdert, so viel müglich sein kan. Unnd nachdem unns fürkhombt, wie etwan viel kirchengezierd, klainoth, stuckh, güllt unnd güter durch die closterleuth verkhaufft, versezt, auch leibgedingsweiß unnd in annder weeg außerhalb unnser bewilligung vom closter kommen, unnd aber unnser mainung ist, daß dieselben klainoth, grundt unnd stuckh unnd güter wider darzue gebracht unnd zu des spitals notturfft genuzt unnd genoßen werden sollen, so haben wir vielgedachten von Baden auferlegt, daß sie solchen entwendte stuckh unnd güetern mit vleiß nachfragen, derhalben erkhundigung hallten, wellche personen sollche güeter innen haben, auch in was weeg unnd titl sie dieselben an sich gewendt haben, unnd dan allen müglichen fleiß fürwenden sollen, dieselben widerumb an das spital zu bringen, unnd wir aber bedenckhen, daß sie zu sollchem unnserer hülff nottürfftig sein werden, so ist verner unnser bevelch, daß ihr euch bey vorgemelltem provincial, seinem verwallter oder dem prior zu Wien unnd iren ordensleuthen, dergleichen auch bey denen von Baden unnd anndern, so darumben wißen haben mögen, mit vleiß erkhundiget, wer oder welche personen solche entwendte stuckh unnd güeter zu dem closter gehörig iezo innhaben, die selben innhaber für euch erfordert unnd mit inen alles vleiß unnd sonderlich mit erinderung, daß solche entwendung des closters cleinoter, stuckh unnd güeter ohn sonder unnser alls herrn unnd landtsfürsten vorwißen unnd bewilligung nit statt oder krafft haben mögen, handlung pfleget unnd sie daran weiset, daß sie denen von Baden dieselben güeter zuhanden des spitals gütlichen abtretten unnd sich selbst nit in mehr unkhossten leiten, welche aber solches nicht thuen wollten, die selben unser regierung unnd camer fürderlich mit namen, auch was ain ieder für ain guet oder stuckh innen hab, anzaiget mit sambt ewerm rathlichen guetbedunckhen, was verner mit ihnen zu handlen sey unnd wie ihr die sachen in ainem unnd annderm weeg allenthalben handlen, ausrichten unnd befinden werdet, daßelb alles wollet vorgemelter unnser regierung unnd camer lauter in schrifft berichten. An dem allem beweisst ihr unnsern gefelligen willen unnd ernstliche mainung. Geben in unnser statt Wien am fünfzehenden tag Martii anno im fünf unnd vierzigisten, unnserer reich des Römischen im fünfzehenden unnd der andern im neunzehenden.

Source Fulltext: MAURER, Augustiner-Eremiten Baden (=FRA II/89, Wien 1998) S. 343-346.