Ehrwürdiger, geistlicher, gar lieber herr prior! Nach entbietung unnser freundlichen unnd guetwilligen dienst zaigen wir euch an, daß unns heut dato ewer schreiben zu Baden uberantworthet worden. Daraus wir vernommen, daß ihr dem herrn Muschinger, vielleicht aus unerfahrenheit, die sachen nit recht zu verstehen geben. Wir haben euch auf ewer begehren biß auf heut dato die 6. uhr vor mittag erstreckht die tagsazung. Wir haben euch auf ewer begehren der küniglichen mayestät commission zugestellt; daraus habt ir deutlich zu verstehen, was unnser verordneten commissarien auferlegt unnd befohlen worden. Dem wollen unnd müßen wir nachkommen unnd gehorsamb laisten unnd haben in namen Gottes aus bevelch unnser gnedigen herrn unnd obrigkeit lautern bevelch, ir erscheinet selbst oder durch ewer befelchaber auf denselben tag oder nit, nichts desto weniger sollen wir handlen. Solches wollen wir vollziehen unnd in beywesen des priors allhie zu Baden handlen. Wie ihr auch meldet, daß ir der burger zu Baden supplication, darauf diese commission erfolgt, ain so klain wißen gehabt, zaigen wir euch an, daß unns commissarien gleicher weiß in der commission nichts eingeschloßen oder uberantwortet worden. Derhalben wir kain wißen darumben haben, sonst wollten wir euch guetwillig davon abschrifft geben. Darnach habt ir euch zu richten unnd was euch von unns dienstlich lieb ist. Datum Baden, den 7. tag Aprilis anno 45.

Source Fulltext: MAURER, Augustiner-Eremiten Baden (=FRA II/89, Wien 1998) S. 349-350.