Wier N. richter, rath, genannten unnd ain ganntze gemain der stat Paden bekhennen sament- unnd sonderlich fur uns unnd all unnser erben unnd nachkhomen offentlich mit disem brief, wo der furkhombt, nachdem unns^a der allerdurchleuchtigist, großmechtigist unnd unuberwindlichist fürst unnd herr herr Ferdinanndt von Gottes gnaden Romischer, zu Hungern unnd Behaimb khünig, infandt in Hispanien, erzherzog zu Österreich, herzog zu Burgundi, Steyr, Kharndten, Crain unnd Wierttemberg etc., grave zu Tyrol, unnser allergenedigister erbherr unnd lanndtfürsst, auf unnser sonder diemuetigs anlangen und underthenigist bitten das augustinercloster alhie zu Paden mit aller und jeder desselbigen ein- und zuegehörungen, fürnemblichen in bedenckhung, das angerüert closster ain lange zeit nicht mer als mit ainer bleiblichen ordensperson besezt, das auch nit allain berüert closster, sonnder auch derselben weingarten und annder gründt gar in abpaw khomen und etlichs einkhomen gar davon gewendt worden, zu unnserm armen, neu angefangen burgerspital aus sonndern gnaden unnd angebornner miltigkhait gnedigelich gegeben unnd doniert, auch hernach dieselbigen varunden unnd ligunden stuckh, gült, güetter unnd einkhomen durch die edlen vessten Gerweckhen Auer von Herrnkhirchen, Georgen Freißleben zum Liechtenstain, Blasien Durner phleger zu Enzesfeldt unnd Benedicten Uz Orenwerger phleger zu Khottingprun als ir Mt. etc. verorndt commissarien gemainer stat Paden unnd ir jedes desselbigen fürgesezten unnd verorndenten spitlmaisters, diser zeit Hannsen Drosendorffers unnsers burgers unnd ratsfreundt, zu hannden des burgersspittals den vergangen sibenden tag Apprilis dises lauffunden funfundvierzigisten jars nach laut aines ordenlichen inventarien ein- und überantwort, welches inventari datum steet den anndern tag des monnats Septembris anno etc. funfundvierzigisten, so durch die verornden herrn commissarien sambt iren gethannen bericht irer khunigelichen Mt. etc. hochlöblichen Niderosterreichischen regierung und camerräthe mit iren aigen aufgedruckhten petschiern unnd undergestelten handtschrifften verferttigt, presentiert unnd übergeben worden etc., wie dann ir khu. mt. etc. gegeben gab- und bewilligung brief, auch darüber gethanne declaration hernach in sich helt und von wort zu wort also lautten. Erstlichen der gabbrief:||
(folgt der Text der Urkunde von 1545 Feb. 15, hier Nr. 138).||
Dann so laut der khunigelichen mt. etc. declaration und erleutterung, so uber obgemelte gab unnd bewilligung hernach beschehen also.||
(folgt das Schreiben von 1545 März 1‚ hier Nr. 140).||
Demnach wir also ir hochgedachten Römischen khunigelichen mt. etc. gab- und bewilligungbriefs, auch ir mt. etc. darüber genedigiste gethane declaration, wie dieselben von wort zu wort lautten, mit aller irer inhalt, clauseln, punctn unnd articln ungeschwecht in ewig zeit gannzlich zu halten unnd zu volziehen hiemit entlich zuesagen, versprechen unnd unns gegen hochernennter khünigeliche mt. etc., auch irer mt. etc. erben in crafft dises unnsers ubergebnen reverß oder gegenbriefs verschriben haben wellen. Wir wellen auch auf der khunigelichen mt. etc. sonndern bevelch unnser vleissig nachforschung unnd erkhundigung halten, das wir die gründtstuckh unnd guetter, so durch unwirtlichait, durch versezen, verkhauffen, leibgeding oder in annder weeg ausserhalb der khünigelichen mt. etc. bewilligung vonn dem closster khomen, erfragen unnd allen müglichen vleiß gebrauchen, dieselben widerumben zu dem closster zu bringen, damit solche güetter zu des spitals notturfft genüzt werden inhalt der khünigelichen mt. etc. obsteeunden gabbrief unnd daruber ervolgten declaration, unnd was wir also khünfftigelich darzuebringen, dasselb der Niderosterreichischen camer jederzeit anzaigen unnd berichten, damit dieselben stuckh oder güetter auch in das inventari geschriben werden mügen, alles threulich ongeverde. Zu warem urkhundt haben wier fur unns unnd im namen unsers aufgerichten burgersspitals disen brief mit unsern gemainer stat Paden anhangunden insigl pekhrefftigt und bewart. Geschehen zu Paden den sontag vor sandt Thomas tag des heilligen zwelffpotten nach Cristi unsers lieben herrn und salligmachers gepurdt im fünfzehenhundert und in dem fünfundvierzigisten jar.

Source Fulltext: MAURER, Augustiner-Eremiten Baden (=FRA II/89, Wien 1998) S. 359-361.