Wir Maximilian, von gots gnaden romischer kúnig, zú allenn tzeitten merer des reichs, zu Húngern, Dalmatien, Croatien etc. kúnig, ertzhertzog zú Osterreich, hertzog zú Búrgúndi, zú Brabannt, zú Geldern etc., grave zú Flanndern, zú Tirol etc., bekennen fúr unns und unnser erben und tún kúnt offennlich mit dem brief, das wir unnsern getréwen lieben .. dem richter, rat und unnsern burgern gemeincklich zú Zwettln und irn nachkúmen von irer vleissigen bete, nútz und aúfnemens willen die genad getan und inen zúsambt dem iarmarckht, so sy bisher gehabt, noch ainen iarmarckt hinfúr ewicklich albegen aúff montag nach dem sonntag Invocavit in der vassten, acht tag vor und acht tag nach, mit fúrstlicher freyúng, rechten und gewonhaiten, wie annder iarmarckht in stetten und merckten unnsers fúrstenthúmbs Osterreich gehallten werden, zú uben und zú gepraúchen vergónnt und erlawbt haben, thún in die gnad, vergúnnen und erláwben in aúch solhs von romischer kúnicklicher und furstlicher macht wissentlich in craft diss briefs und mainen und wellen, das inen von nyemands daran dhein irrung noch hindernúss beschéhe, ungeferlich, doch andern unnsern stetten und merckten an iren iarmarckten, freyhaiten und rechten unschedlich. Davon gepieten den edeln unnsern lieben getréwn .. allen unnsern háwptléwten, lanndmarschalckhen, graven, freyen herrn, rittern und knechten, phlegern, verwesern, lanndtrichtern, búrgermaistern, richtern, retten, búrgern, gemeindten und allen anndern unnsern ambtléwttenn, unnderthanen und getréwen ernnstlich und vestigklich, daz sy die benannten richter, rat und unnser búrger zú Zwéttl(e)n und ir nachkumen bey solhem oberúrtem néw gegebnen iarmarckht berúblich beleiben, aúch sy und die, so zú und von inen mit irem gewerb und henndlen ziehen, der obgemelten fúrstlichen freyúng, recht und gewonhait gepraúchen und geniessen lassen und dawider nicht dringen, bekúmbern noch besweren, noch des yemannds annderm zu túnd gestatten, bey unnser ungnad und straff zú vérmeyden. Das mainen wir ernnstlich. Mit urkundt diss briefs, geben zú Wyenn an phintztag vor Sannd Anthonien tag nach Cristi gepúrd vierzehennhundert und im vierúndnewnzigisten, unnser reiche des romischen im achten und des húngrischen im vierden iarenn.||
||
Commissio domini regis in consilio.||
||
Conr. Sturczel, ritter, canzler.