Wir Maximilian, von gottes genaden rómischer kúnig, zu allenn czeitten merer des reichs, zu Húnngern, Dallmatien, Croatien etc. kunig, ertzhertzog zú Ósterreich, hertzog zu Burgúnndi, zú Brabannt, zú Ghelldern etc. grave zu Flanndern, zu Tyrol etc., bekennen fúr unns und unnser erben offennlich mit dem brieve, das unns unnser getrewén lieben .. richter, rat und die burger geménicklich zu Zwetteln diemúetigklich anrúffen und bitten haben lassen, daz wir in all und yégklich ir genad, fréyheit, recht, privilegien, alt herkomen und gúet gewonhait, so iren voreltern von weylennd unnsern vordern hertzogen zú Osterreich gegeben und bestéttet sind und sy herbracht, zú vernéwen, confirmirten und zu bestetten genedigklich gerúchten. Des haben wir angesehen der bemelten von Zwetteln vleyssig bete, aúch die unndterténigen getréwen unnd willigen diennste, so sy unnsern vordern und unns getan und ertzaigt haben, téglichs tun und in kúnnftig zeit wol tun súllen und múgen, und haben dardúrch und umb irs nútz und aúfnemens willen ine, iren erben und nachkomen all und yegklich ir vorgemelt brief genad, fréyheit, recht unnd guet gewonhait, wie sy die von allter herbracht haben, inmassen als ob die von wort zu worten hirynn geschriben wéren, von rómischer kúnigklicher macht und als regierennder herr und lanndsfúrst zu Osterreich vernewt, confirmiert und bestettigt, vernéwen, confirmiren und bestetten ine die aúch wissentlich in craft dits briefs, meinen, setzen unnd wellen, daz die in allen iren púncten und artigkeln darynn begriffen genntzlich béy creften beléyben, gehalten und von nyemannds dawider getan noch gehanndelt werden sol in dhein wéyse. Davon gepieten wir den edeln unnsern lieben getréwen, .. allen unnsern hawptléwtenn, lanndtmarschalchen, gráven, freyen herren, rittern, knechten, vitzthumben, phlegern, verwesern, lanndtrichtern, búrggraven, búrgermeistern, richtern, ráten, burgern unnd gemeinden und allen anndern unnsern amptlewten, unnderthanen und getréwen ernnstlich und wellen, daz sy die vorgenanntten richter, rate und búrger gemeingklich zu Zwetteln, ir erben und nachkomen bey den vorgemelten iren brieven, genaden, fréyhaitten, rechten und allten gúeten gewonheiten, auch diser unnser vernéwúng, confirmirunng und bestettúnng nicht verhynndern noch irren, sonnder sy der geruelich gebraúchen, genyessen und gentzlich dabey beleyben lassen und dawider nit tún noch yemannds zú thúnn gestatten, als lieb in allen und ir yedem sey, unnser swer ungenad zu vermeyden. Daz meinen wir ernnstlich. Mit urkunnd dits briefs, besigilt mit unnserm kunigklichen anhanngendem innsigel, geben in unnser stat Wyenn an phinztag nach unnser lieben frawen tag Conceptionis nach Cristi geburdt viertzehennhúnndert unnd im drewundnewnczigisten, unnsrer reiche des romischen im achtennden und des hunngrischen im vierden iarenn. Commissio domini regis in consilio.