Wir, Johanns Graff, bayder rechtenn licenciat etc. brobst, Wolfganng Sailer dechant, Rueprecht Merchl der elter unnd das ganz capitel des khayserlichen stifft im Liechtental inn Sand Iohans khirchenn auswendig der maur Zwetel, Passauer bistumbs, bekhennen fur uns unnd all unser nachkhumen khreftigkhlich zw ewigen zeitenn, nach dem die ersamen unnd weisenn n. richter unnd radt unnd die gancz gemain der stadt Zwetel durch erleichtung unnd gnad, als nit zw zweiflen ist, got des heiligenn geist ainhellichlich mit guetenn willenn von wegenn der ere unnd lob gottes unnd merung seines heiligenn dyenste, auch troste ierer vorvorderenn, frenndt, ierer selbs, auch nachkhumen unnd aller gelaubigen selen zwegebenn unnd, sovill an in gelegen, verwilligt fur sich unnd ier nachkhumenn in die erhebung unnd auffrichtung des vorgemeltenn stifft, so durch hochleblicher gedechnus khayser Fridrich den dritten unnd durch den grosmechtigenn unyberwindlichistenn fursten unnd herrenn, herrenn Maximiliann, die zeid remischer khayser etc., unnserenn allergenedigistenn herrenn, genedikhlich beschechenn unnd ierer bayder maiestadt brieff unnd sigil anzaigenn, das wir fur uns und unser nachkhume(n)n da engegenn habenn unß auch redlichen unnd vor augenn anzaiglichenn ursachenn verwilligt, verwilligen uns auch hiemit in khrafft dises brieffs fur uns unnd all unser nachkhumenn brobst, dechandt unnd capitel vorgemeltes stifftz zw ewigenn zeittenn, das das [!] wir wochenlich in der capellen unser liebenn Frawenn in der stadt Zwedel lesen sollenn unnd ausrichtenn: nemlich auff auff [!] gotzleichnann [!] altar vier gesprochenn mess, pitten fur die, so die selbeen gestifdt habenn; item auff Sand Iacobs altar vier gesprochenn meß, pitteen fur Michell Khinig, Ulrich unnd Wolfgang Sailer, ier hawsfraw, khindt unnd freundt, so die gestifft habenn; item auff der heiligeenn drivaltichaidt altar finf meß, pittenn fur Leonhardt Truchenmulner sell, sein hawsfraw, khind unnd freund, so die selbenn gestifft habenn. Wo wir aber oder unser(r) nachkhumenn so ablessig. da got vor sey, wurdenn unnd selich obangezaigt gestifft meß wochenlich zw ewigenn zeittenn, wo sich doch die nit zw lesenn ehaffte not nit gibt, nit volprachtenn, lesenn liessenn unnd an ursach saumig wurdenn, sellenn unnd mogenn alsdan richter unnd radt unnd gemain der stadt Zwetel sich der guetter, so zw der oder den selbenn versaumptenn mess oder messenn gestifft, understenn, dye einziechenn unnd nuzenn, als lang bis durch uns, unnser nachkhumenn brobst, techanndt unnd capitel die mess, wie obenn stedt, unnd die versaumptenn erstadt unnd volpracht werdenn, darumb auch gegenn nyemancz verprochen habenn. Item auch vonn obangezaigtenn ersamenn weysenn richter unnd radt unnd gmain der stadt Zwetel redlich unnd gottlich in dem unnd allenn, die er gottes antreffundt, erzaigung unnd auch ander redlich unns darzwe layttundt ursach verwilligenn wir uns fur uns unnd unser nachkhumenn brobst, techandt unnd capitel zw ewigenn zeittenn, das wir sullenn unnd wellenn alle tag teglich inn der capelln unnser liebenn Frawnn in der stadt ain hochampdt zw dem hoch singenn unnd zw denn abend zw awenlicher zeidt vesper unnd in der vastenn compledt singenn sullenn unnd wellenn ann alle ausredt, doch, da gott vor sey, ob sich ursach geb aines interdicht, zw dem zw haltenn mit verpundenn sein, treulich unnd unngeverlich, unnd nach dem die stifftbrieff der brobstei des spital halbenn anzaigenn, die armen leydt inn unnser, unnserenn nachkhumenn versehung zw haltenn, habenn wir fur uns unnd unserr nachkhumenn verwilligt, mit dem selbenn spitall zw ewigenn zeittenn zw haltenn, wie brieff unnd sigil vonn alter herr durch ain pharrer, auch richter, radt unnd gmain hie zw Zwetel auffgericht unnd annzaygenn. Die weill aber durch selich unser gottlicher lieb unnd verwilligung inn der capelnn unnserr liebenn Frawenn also das hoch singenn zw ewigenn zeittenn gehaltenn sol werdenn unnd samung darunder albeg geschiecht, die denn pillich zw der pfarr Sannd Iohanns khirchenn auff denn perg gantz alle zwestedt, habenn wir auch fur unss, unnser nachkhumenn brobst, techanndt unnd capitel, auch aus redlichen ursachenn, das nunn furpass seliche samung albeg herundenn inn der capelnn beschechenn unnd albeg der dritt pfennig darbey beleibenn unnd denn zechmaister geantwurdt, aber die zwenn tayll denn brobst, techannt unnd capitel, wenn sy darzwe einzenemenn verornenn, geraicht unnd gebenn werdeenn. Des zw urkhunnd unnd der obgeschribenn sachenn ewiger behaltung gebenn wir, vorgemeldt brobst, thechandt unnd capitel obgeschribenn richter unnd radt unnd gmainn disenn brieff bewart mit unnser, der brobstei unnd capitel, anhangundt innsigill. Beschechenn zw Zwetel am zechentenn tag des manatz Marci nach Cristi gepurdt finffzehenhunderdt unnd im dreyzehenndenn iar.