Wir Rudolff der ander, von Gottes genaden erwuelter Rómischer kaiser, zu allen zeitten mehrer des reichs, in Germanien, zu Hungern und Behaimb, Dalmatien, Croatien und Sclauonien künig, erczherczog zu Osterreich, herczog zu Burgundt, zu Brabant, zu Steyr, zu Kärndten, zu Crain, zu Luczemburg, zu Wirtemberg, Ober- und Niederschlesien, fürst zu Schwaben, marggrave des heiligen Romischen reichs, zu Burgaw, zu Marhern, Ober- und Niderlaußnitz, gefurster grave zu Habspurg, zu Tyrol, zu Pfirt, zu Kyburg unnd zu Görcz, lanndtgrave in Elsaß, herr auf der Windischen Marck, zu Portenaw unnd zu Salins bekennen für unns unnd unnser erben offentlich mit dem brieff, das unns unnser getrewen lieben n. richter, rath unnd die burger gemainelich unnserer statt Zwetl diemietigelichen anrueffen unnd biten haben lassen, das wir inen aller und jedlich ir gnadt, freyhait, recht, privilegia, alt herkomen unnd guete gewonhait, so inen von weilendt unnsern vordern fürsten von Osterreich gegeben, die inen auch jungstlich von weilendt unnserm lieben herrn unnd vattern kaiser Maximilian hochloblicher gedechtnus als regierendem herrn unnd lanndtfúrsten in Osterreich mit gnaden confirmiert unnd bestat worden waren, widerumb zu verneuern, zu confirmiern unnd zu bestaten genedigelich geruechten. Deß haben wir angesehen der bemelten von Zwetl vleissige bete, auch die unndterthenigen, getrewen unnd willigen dienst, so sy bemelten unnsern vorfordern, fürsten unnd erczherczogen zu Österreich, gethan unnd erczaigt haben unnd unns hinfüren auch wol thuen mügen unnd sollen, unnd inen, iren erben unnd nachkumen dadurch unnd aus sondern gnaden umb ires nutz unnd aufnembens willen all unnd jedliche vormelte brieff, gnadt, freyhait, recht unnd guet gewonhait, so vil sy der in gebrauch sein, unnd darzue in den freyhaiten, darumben sy in ansprach unnd rechtfertigung sten mechten, unnergriffen unnd on schaden, inmassen, als ob die von wort zu wortten hierin geschriben wären, als jeczt regierender erbherr unnd landtsfürst in Österreich auch genedigelichen verneut, confirmiert unnd bestätt, vernewen, confirmiern unnd bestatten inen die auch wissentlichen in crafft diß brieffs, mainen, seczen unnd wellen, das die in allen iren puncten, articln unnd begreiffungen genczlich bei krefften bleiben, gehalten unnd von niemants dawider gethan oder gehandlet werden soll in kain w[eis]. Darauf gepieten wir den edlen unsern lieben getrewen n. allen unnsern hauptleuthen, lanndtmarschalhen, graven, freyen herrn, rittern, knechten, viczdomben, pflegern, verwesern, lanndtrichtern, burggraven, burgermaistern, richtern, rathen, burgern, gemainden unnd sonst allen andern unnsern amptleuthen, unndterthanen unnd getrewen ernstlich unnd wellen, das sy die vorgenannten richter, rath unnd burger gemainigelich zu Zwetl, ir erben unnd nachkomen b[ei] den vorgemelten iren brieffen, gnaden, freyhaiten, rechten unnd alten gueten gewonhaiten, auch diser unnser confirmation unnd bestatung nit verhindern noch yrren, sonder sy der gerüebigelich gebrauchen, genüessen und genczlich dabei bleiben lassen unnd dawider nit thuen noch des jemants andern zu thuen gestatten, als lieb in allen unnd ir jedem seie, unnser schwere ungnadt zu vermeiden. Das mainen wir ernstlich. Mit urkunndt diß brieffs, besiglt mit unnserm kaiserlichen anhangendem insigl. Geben in unnser statt Wienn den zweiunndzwainczigisten tag des monats may nach Christi unnsers lieben herrn unnd seligmachers gepurde funnfczehenhundert unnd im zwayundachczigisten, unnserer reiche des römischen im sibenden, des hungerischen im zehenden unnd des behaimischen im sibenden jarn.

Source Fulltext: Transkription und Regest: Mag. Klaus Birngruber