Wir Maximilian der ander, von Gottes genaden erwelter rómischer kaiser, zu allen zeitten merer des reichs, in Germanien, zu Hungern, Behem, Dalmatien, Croatien unnd Sclauonien etc. khunig, ertzherczog zu Ósterreich, hertzog zu Burgundy, zu Brabandt, zu Steyr, zu Khárndtn, zu Crain, zu Lúczemburg, zu Wuerttemberg, Ober- unnd Niderschlesien, furst zu Schwaben, marggrave des heilligen rómischen reichs zu Burgaw, zu Márhern, Ober- unnd Niderlaußnicz, gefurster grave zu Habspurg, zu Tyroll, zu Pfierdt, zu Kiburg unnd zu Górcz etc., lanndtgrafe in Ellseß, herr auf der Windischen March, zu Porttenaw unnd zu Sallins etc., bekhennen fur unns unnd unnser erben offentlich mit dem brieff, das unns unnser getrewen lieben n. richter, rath unnd die búrger gemainlich unnserer stat Zwetl demuettigclichen anrueffen unnd bitten haben lassen, das wir inen all unnd iedlich ir gnad, freyhait, recht, privilegien, allt herkhumen unnd guet gewonhait, so inen von weillendt unnsern vordern, fursten von Ósterreich, gegeben, die inen auch iungstlich von weillendt unnserm lieben herrn unnd vattern kaiser Ferdinannden hochlóblicher gedechtnus, alls sein maiestat noch in furstlichen wirden gewest, alls regierendem herrn unnd lanndtsfursten in Ósterreich mit gnaden confirmiert unnd bestet worden weren, widerumb zu vernewen, zu confirmiern unnd zu bestetten genedigclich geruechten. Des haben wir angesehen der bemelten von Zwetl vleissig bete, auch die underthenigen, getrewen unnd willigen diennste, so sy bemelten unnsern vorfordern, fursten unnd ertzherczogen zu Ósterreich, gethan unnd erzaigt haben unnd unns hinfuron auch woll thuen mugen unnd sollen, unnd inen, iren erben unnd nachkhumen dadurch unnd aus sondern gnaden umb ires nucz unnd aufnemens willen all unnd iedliche vorgemelt brieff, gnad, freyhait, recht unnd guet gewonhait, sovill sie der in gebrauch sein, unnd darzue in den freyhaitten, darumb sie in ansprach unnd rechtferttigung steen móchten, unvergriffen unnd on schaden, in massen, alls ob die von wort zu wortten hierin geschriben weren, alls iecz regierender erbherr unnd lanndsfurst in Ósterreich auch genedigclichen verneut, confirmiert unnd bestet, vernewen, confirmiern unnd bestetten inen die auch wissentlich in crafft dises brieffs, mainen, setzen unnd wellen, das die in allen iren puncten, articln unnd begreiffungen gentzlich bey crefften bleiben, gehalten unnd von niemandts dawider gethon oder gehandelt werden soll in khain weiß. Darauf gebietten wir den edlen unsern lieben getrewen n. allen unnsern haubtleutten, lanndtmarschallhen, graven, freyen, herrn, rittern, khnechten, vitzdomben, pflegern, verwesern, lanndtrichtern, burggraven, burgermaistern, richtern, rátten, burgern, gemainden unnd sonnst allen andern unsern ambtleutten, underthonnen unnd getrewen ernnstlich unnd wellen, das sie die vorgenanten richter, ráth unnd burger gemainlich zu Zwetl, ir erben unnd nachkhumen bey den vorgemelten iren brieven, gnaden, freyhaitten, rechten unnd alten guetten gewonhaiten, auch diser unnser confirmation unnd bestáttung nit verhindern noch irren, sonnder sie der gerueblich gebrauchen, geniessen unnd gentzlich darbey bleiben lassen unnd dawider nit thuen noch des iemandts andern zu thuen gestatten, alls lieb in allen unnd ir iedem sey, unnser schwere ungnad zu vermeiden. Das mainen wir ernnstlich. Mit urkhundt des brieffs, besiglt mit unnserm kaiserlichen anhangenden insigl. Geben in unnser stat Wienn am neunzehenden tag des monats february nach Cristi unnsers lieben herrn geburt funffzehenhundert unnd im funffunndsechzigisten, unnserer reiche des rómischen im dritten, des hungerischen im andern unnd des behemischen im sibenzehenden iaren.||
||
Maximilian||
vidit Jo. Bap. Weber dr.||
||
Auf der Plica:||
Der stat Zwetl confirmation.||
Ad mandatum domini electi imperatoris proprium.||
L. Kirchslager