Ich Mert, Engelharts sun zu dem Maingelts¹, und all mein erben verjechen mit dem prieff, daz mich dy erbern purger, der rat und dy gancz gmain ze Zwetel ergeczt habent der scheden, dy ich etwe vil enpfangen hčt van des spitals wegen zu sand Merten ze Zwetel. derselben scheden hab ich mich gancz und gar verbegen und sol ich und mein erben hinfur chain vodrung, weder vil noch benig, darauz machen, weder mit recht noch an recht. darumb habent sew mir ze mein tegen alain verlazzen daz holcz und daz wysmad, daz gelegen ist an dem Hyercz(e)nslag² und haizt der Parnasch³, davan ich in all iar dyen(en) schol ain pfunt Wienn(er) pfenning an sand Michels tag und zwainczk meczen guts magens an sand Merten tag und ain pfunt Wienner pfenning an sand Jorgen tag an alz vercziechen. wer awer, daz ich den dinst verzug oder daz ich daz gůt leichter bolt machen oder ze vil geniezzen bolt, wenn sew mich⁴ ermanent mit zwain erbern man, so hab ich obgenanter Mert alle meine recht verlorn und mugen mich dy obgenanten purger bol verchern und ěrn frumb damit schaffen, wie in daz fugt. Daz lub ich in pey meiner trewn an gewér und gib in auch darumb den offen prieff mit meins aigen hern anhangundem insigel Stephans des parawer zum Reinp(re)chts⁵, den ich dar umb vleizz gepeten hab, im und sein erben an schaden, darunder ich mich und all mein erben verpinden, allez stčt ze haben, daz vor geschriben ist. geben nach Christ purd drewzehenhundert iar darnach in dem sex undnewczikisten iar am mitichen var Philippi Jacobi.