In nomine patris et filii et spiritus sancti. Decanus de Sleunze et plebanus de Polan arbitri electi ab abbate de Altenburc et Augustino sacerdote de Horn hoc arbitrium protulerunt. Abbas omnes decimaciones habebit maiores et minutas in tota barrochia Horn preter decimales denarios et VII domos, Modric inferiori tres domos, Vmbsvaiffign vnam, Preitinaich vnam, Zuncra vnam, Mulueld vnam. Augustinus singulis annis dabit VI solidos abbati, tres solidos in epiphania, tres solidos in festo sancti Georgii. Augustinus de manu abbatis, vt purget non canonicam institutionem, recipiet investituram. Pro gratia abbatis et pro expensis Augustinus dabit abbati duas libras, unam in festo omnium sanctorum et unam in capite ieiunii. Pro contumeliis et probris sacerdotis et lesione seruorum Augustinus tempore processionis diebus dominicis tribus cum uirga discalciatus offeret se abbati petens veniam. Si episcopus inpetierit Augustinum de periurio sicut eis commiserat remittendum decreuerunt. Si abbas venerit contra arbitrium istud, XX libras stipulatus est arbitris, et obligauit se promittendo. Si Augustinus venerit contra arbitrium, promisit per stipulationem X libras, et suspensus erit a diuinis, donec coram arbitris satisfecerit. Preterea uterque fide data uice sacramenti ad obseruacionem arbitrii se obligauit. Acta sunt hec in ecclesia Horn coram abbate de Jerus et mag. Wernhardo de Sizendorf et aliis viris discretis clericis: Hessone de Stregen, Herdegno de Erlbach, Dietrico de Modric, Rapotone de Molt militibus; Ottone de Preitneich, Ditmaro Choz, Hvgone de Molt, Reinbotone de Horn blebanis; Alberone, Tolrone, Heinrico Wacherav, Ditmaro decimatore et aliis quam pluribus.

Source Fulltext: BURGER, Urkunden Altenburg (=FRA II/21, 1865) S. 6-7