Alexander episcopus seruus seruorum dei dilectis filiis abbati et conuentui monasterii de Altenburch ordinis sancti Benedicti Patauiensis diocesis salutem et apostolicam benedictionem. Justis petentium desideriis dignum est nos facilem prebere consensum et uota, que a rationis tramite non discordant, effectu prosequente complere. Eapropter dilecti in domino filii uestris iustis postulationibus grato concurrentes assensu personas uestras et locum, in quo diuino estis obsequio mancipati, cum omnibus bonis que impresenciarum rationabiliter possidetis, aut in futurum iustis modis prestante domino potestis adipisci sub beati Petri protectione suscipimus. Specialiter autem terras, domos, possessiones, pascua, siluas et alia bona uestra, sicut ea omnia iuste ac pacifice possidetis, uobis et per uos monasterio uestro auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre protectionis et confirmationis infringere uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Laterani XII. Kal. Maij, pontificatus nostri anno tertio.

Source Fulltext: BURGER, Urkunden Altenburg (=FRA II/21, 1865) S. 12