Nos Ulricus dei gratia abbas de Altenburge eiusdemque loci fratres ordinis sancti Benedicti Patauiensis diocesis uniuersis presentes litteras inspecturis uel audituris cupimus fore notum, quod in causa, que inter nos ex una parte et Andream sacerdotem ex altera vertitur coram venerabili patre Olmuscensi episcopo vel eius subdelegato, quicunque sit, super ecclesia, que dicitur Rorenphac, magistrum Ricardum presentium exhibitorem nostrum constituimus procuratorem, ad excipiendum, defendendum et contradicendum et, cum uiderit expedire, ad respondendum, et si necesse fuerit, ad appellandum et generaliter ad omnia alia facienda, que nos in personis essemus propriis facturi. Damus eciam liberam facultatem eidem magistro, cum uiderit expedire, alium procuratorem substituendi. Ratum autem et gratum promittimus nos habituros, quicquid idem magister uel procurator ab eo substitutus in predicta causa nostro nomine duxerit faciendum, ac eum ab honere satisdationis releuamus. Datum Wienne in die sancti Mauricii sociorumque eius anno domini M.CC.LXII.

Source Fulltext: BURGER, Urkunden Altenburg (=FRA II/21, 1865) S. 13-14