Vt facta hominum firmiora permaneant, roborari ea conuenit proborum virorum testimoniis et apicibus litterarum. Hinc est, quod nos Chunradus dei gratia abbas in Altenburch scire volumus vniuersos presentium inspecturos, quod cum villa dicta Stanigeinsdorf ecclesiam in Ryetenburch parochiali iure respiceret ab antiquo, nec eiusdem ville incole, eandem suam parochiam propter vie distantiam remotiuam statutis temporibus vt debebant, licet ad hoc a suis pastoribus strictius artarentur potuerunt frequentare, nec etiam ipsi rectores ecclesie, eisdem suis parochianis ecclesiastica sacramenta, vt necesse habeant, propter viarum ac etiam gverrarum obstacula comode potuerint similiter ministrare, quod ex eo patet et probari potuerit euidenter, quia eadem villa propter has causas precipuas a multis temporibus retroactis mansit inculta, et a paucissimis fuit inhabitatoribus frequentata, honorabilis dominus Heinricus prepositus de Pernekke et conuentus venerabilium dominarum ibidem, quia eandem sibi contiguam in proprietate sue ecclesie possidebant, sentientes se et suam ecclesiam, ex defectu colonorum ibidem quam plurima dampna pati, de consilio et assensu rectoris sui venerabilis abbatis ecclesie Yerucensis Chunradi nomine cum domino Paulo plebano ecclesie in Rorenpach, ad quam ecclesia illa in Ryettenburch iam predicta filiacionis nomine noscitur pertinere, de exemptione dicte ville a matrice sua ecclesia tractare volentes, nos et conuentum nostrum, ad quos ecclesia in Rorenpach iam prefata iure pertinet patronatus, vt assensu nostro hoc fieret, postularunt, nos vero communicato fratrum nostrorum et aliorum proborum et fidelium virorum consilio, vtrarumque partium intentionem piam et rationabilem decernentes, exemptioni tali consensimus beniuola voluntate, vt ipse prepositus supradictus et conuentus de Pernekke, domino Paulo plebano in Rorenpach in recompensationem sui iuris, vnius talenti redditus cum exeniis et ceteris suis appenditiis in Ramveldspach assignarent, vt per hoc indempnitas matricis ecclesie imposterum caueretur. Quibus redditibus ipsi matrici ecclesie assignatis et a domino Paulo ecclesie plebano ibidem pro sufficiente acceptatis, jdem plebanus renunciauit omni iuri parochiali, quod in predicta villa Stanigeinsdorf et alia, que dicitur Perchtoldsdorf, ad suam ecclesiam hactenus pertinebat et ad ecclesiam in Pernekke libere resignauit, in omnem eventum de ceteropertinere. In cuius rei testimonium presentes litteras conscriptas ecclesie in Pernekke tradidimus sigillorum nostrorum munime roboratas et a ipsis e conuerso super resignationem reddituum premissorum ipsorum litteras sigilli honorabilis domini abbatis ecclesie Yrocensis, quam etiam suorum sigillorum robore consignatas recepimus et firmatas. Huius facti testes sunt: dominus Wolframus plebanus de Stregen, dominus Heinricus plebanus de Horn, dominus Levpoldus plebanus de Mederico, dominus Gotfridus sacerdos de Ryetenburch, dominus Otto miles de Freitzlarn, Heinricus frater suus, Heinricus Wiltperger, Heinricus Dachpeche, Gotschalcus de Fronhoven, Prehtlo de Chrug, Otto de Fuenvelde, Chunradus frater suus, Hertvicus de Rorenpach, Vlricus de Raizdorf. Levpoldus de Japans, Rugerus de Japans, Levpoldus, Dittricus, rustici de Mederico, et alii quam plures. Actum et datum in Altenburch, anno domini MCCLXXXVIII, quarto Nonas Marcii.

Source Fulltext: BURGER, Urkunden Altenburg (=FRA II/21, 1865) S. 40-41