Ego Paulus plebanus de Rorenpach humillimus notum volo fieri vniuersis tam presentibus quam futuris hanc litteram inspecturis, quod cum dominus Otto dictus Poncius domum vnam in Chrems, quam ab ecclesia sancti Lamberti in Altenburch iure precario actenus tenuerat, voluntate beniuola resignasset, et venerabilis dominus Chunradus abbas eiusdem monasterij de consensu et consilio fratrum suorum eandem domum soli persone mee eadem eciam iure precario, quod uulgariter leipgedinge dicitur, pro censu et seruicio debito et in scriptis expresso ad vite mee tempora contulisset, non solum collacionis domus huiusmodj iam accepte, immo pocius multe gratie cum affectu pio pariter et effectu a reverendo domino meo abbate predicto et honorabili suo conuentu, impense michi a primevo tempore vite mee, memoria incitatus, eidem meo domino et suo conventuj promisi, et ad hoc ipsum me fide data firmiter obligaui, quod ad laudem dei et gloriosissime sue matris, ac ob mei memoriam et anime mee salutem, animarumque omnium meorum predecessorum remedium sempiternum, infra annj spacium pro duode im talentis denariorum Wiennensium possessiones aliquas debeam comparare, quas ab ecclesia sancti Lamperti in Altenburch prenominata iure similiter precario receptas possideam, et post tempora vite mee ad ipsum Altenburgense monasterium libere pertineant et eiusdem loci conuentus se de ipsis vna cum domo sua in Chrems intromittere debeant, et easdem possidere postea pacifice et quiete. Preterea etiam ego Paulus suo affectu, quo me dilecti mei domini prosecuntur, inductus exnunc, presentibus legacione testamentaria ordino inter viuos, vt si quod absit, preveniente morte vniuerse carnis viam ingrediar intestatus, quod ad ecclesiam in Altenburch pretaxatam omnia mea deposita, quecumque illa fuerint, vel quocumque nomine censeantur, que in prenominata domo in Chrems reperta fuerint, me defuncto, debeant liberaliter pertinere. Vt igitur animi mei propositum sue perfectionis recipiat finem bonum et firmum inviolabiliter permaneat atque ratum, presentem litteram inde conscriptam supradictis dominis et fratribus in Altenburch tradidi sigilli mei karactere consignatam, ad cautelam quoque maioris firmitatis et credencie sigillis etiam duobus, tam sigillo venerabilis dominj Chunradi abbatis Yerocensis, quam etiam honorabilis dominj Heinrici prepositi Pernekkensis communiri pro testimonio personaliter inpetraui. Huius rei testes sunt: dominus Leupoldus plebanus de Noua ecclesia, dominus Wolframmus plebanus de Stregen, dominus Heinricus plebanus de Horn, dominus Leupoldus plebanus de Moderico, dominus Otto dictus Poncius de Chrems, magister Irenfridus, Bartholomeus dyaconus, fratres sui Jacobus et Stephanus ibidem, dominus Heinricus de Pach, dominus Poppo de Peugen, milites; Chalhardus de Fuenvelde, Heinricus de Wiltperch, Gotscalcus de Fronhoven, Heinricus Dachpech, Prehtlo de Chrueg, Hugo de Molt, clientes; Otto, Chunradus, Sifridus, fratres de Fuenveld, Albero Walkerstainer; Titmarus, Wolkerus, Vlricus Wienner, famuli domus. Actum et datum in Altenburch, anno dominj MCCLXXXVIII. in die sancti Cholomannj.

Source Fulltext: BURGER, Urkunden Altenburg (=FRA II/21, 1865) S. 44-45