Quoniam ea, que pro animarum remediis intuitu dei fiunt, magna propter obliuionem hominum indigent roboris firmitate, hinc est quod nos Walchunus diuina miseracione abbas, Sifridus prior, totusque conuentus in Altenburch notum facimus vniuersis tam presentibus quam futuris hanc litteram inspecturis, quod cum Ditmarus de Altenpurch famulus noster instinctu permotus diuino in proprietatem nostre ecclesie dimidij talenti redditus in Celderndorf situati aput Nycolaum Sagittarium de Hymperch sua pecunia comparasset, petiuit a nobis, quod suam donacionem iuxta sue voluntatis desiderium, que talis est: singulis feriis secundis per annum fratri celebranti primam missam pro sui suorumque predecessorum pervigili memoria inibi iugiter facienda per fratrem infirmarium, qui ipsos redditus etiam in commisso habeat, ex nunc et imperpetuum predictorum nomine in duorum denariorum proventibus pitancia procuretur; de residuis vero eo viuente pro salute animarum ipsarum anniuersarius agatur feria secunda proxima post dominicam Invocauit, quem tamen se defuncto eo ordine duxit et statuit per omnia in diem anniuersarium sui obitus transferendum, admittere curaremus; nos vero non solum affectum suum pariter et effectum pio corde procedere pensantes, jmmo etiam scientes sanctam et salubrem esse cogitacionem pro defunctis fidelibus exorare, de nostri conuentus consilio libenter sue voluntatis et peticionis racionabile desiderium admittendum indulsimus et duximus taliter confirmandum, vt si per euentum vel negligenciam totalis illa condicio prius posita in errorem vel obliuionem ducta per nos aut nostros successores fuerit immutata, quod extunc predicti redditus ad iam dictum Ditmarum nostrum famulum de Altenburch, vel alios sibi consanguinitatis sev propinquitatis linea succedentes, omni occasione semota deuoluatur ac etiam libere revertatur tamdiu, quousque totalis illa posicio a fratribus ecclesie fuerit iterum ab inicio innouata. Vt autem predicta omnia perpetue firmitatis vigorem contineant et valorem, et tam a nobis quam a nostris successoribus inviolabiliter obseruentur, jn euidens testimonium premissorum supradicto Ditmaro de Altenburch presentes nostras litteras tradidimus, sigillorum nostrorum, tam conuentus, quam nostri munimine roboratas. Huius rei testes sunt: dominus Wolframmus de Stregen, dominus Paulus de Rorenpach, dominus Heinricus de Sancta Margareta, dominus Heinricus de Horn, sacerdotes et plebani, capellani nostri; dominus Chunradus de Pu^ochperch, dominus Heinricus de Pach, Heinricus de Wiltperch, Heinricus Dahpech, Gotschalcus de Vronhoven, Albero Waltkerstainer, Vlricus Sturnus, Chunradus de Molt, Siboto ibidem, famuli nostri, et alij quam plures. Datum et actum in Altenburch, anno domini MCC. nonagesimo tercio, jn die sancte Lucie virginis.

Source Fulltext: BURGER, Urkunden Altenburg (=FRA II/21, 1865) S. 74-75