Qvoniam ea que intuitu dei fiunt pro remediis animarum magna propter obliuionem hominum indigent roboris firmitate, hinc est, quod nos Walchunus diuina miseracione abbas, Sifridus prior, totusque conuentus in Altenburch notum facimus vniuersis tam presentibus quam futuris hanc litteram inspecturis, quod cum dominus Tristrammus plebanus de Pu^ochperch instinctu permotus diuino in proprietatem nostre ecclesie dimidij talenti redditus in Celderndorf situati apud Nicolaus Sagittarium de Hymperch sua pecunia comparasset, petiuit a nobis, quod suam donacionem secundum posicionem sui voti, que talis est: frater infirmarius bona ipsa in commisso habebit annis singulis eo viuente in vigilia sancti Bartholomei et in die fratribus ad reffectorium super statutam prebendam de eisdem pitanciam ministrabit, vt proinde in iam dicta vigilia sui et predecessorum suorum memoria celebris cum missa et vigiliis peragatur, tamen eo defuncto in anniuersario die sui obitus eo ordine sicut nunc ita et tunc statuit per omnia obseruanda, admittere curaremus, nos vero non solum affectum suum pariter et effectum pio corde procedere pensantes, immo etiam scientes, sanctam et salubrem esse cogitacionem pro defunctis fidelibus exorare, de nostri conuentus consilio libenter sue voluntatis et peticionis racionabile desiderium admittendum indulsimus et duximus taliter confirmandum, vt si per eueritum vel negligentiam totalis illa condicio prius posita per nos aut nostros successores fuerit immutata, quod ex tunc predicti redditus ad iam dictum plebanum de Pu^ochperch aut suos successores plebanos ibidem per manus domini de Pu^ochperch cuiuscumque retrahantur et libere devoluantur, tam diu, quousque illa posicio a fratribus ecclesie fuerit ab inicio iterum innouata. Vt autem predicta omnia perpetue firmitatis vigorem contineant et valorem, et tam a nobis, quam a nostris successoribus inviolabiliter obseruentur, in euidens testimonium premissorum supradicto dominoTristammo plebano in Pu^ochperch presentes nostras litteras tradidimus, sigillorum nostrorum tam conuentus, quam nostri munimine roboratas. Huius rei testes sunt: dominus Wolframmus de Stregen, dominus Paulus de Rorenpach, dominus Heinricus de Sancta Margareta, dominus Heinricus de Horn, sacerdotes et plebani, cappellani nostri; dominus Chunradus de Puochperch et senior filius suus dominus, dominus Heinricus de Pach, Heinricus de Wiltperch, Heinricus Dahpech, Gotschalcus de Vronhouen, Albero de Waltkerstain, Ditmarus procurator noster, Vlricus Sturnus, Siboto de Molt, famuli nostri, et alii quam plures. Datum et actum in Altenburch, anno domini MCC. nonagesimo tercio, Lucie virginis.

Source Fulltext: BURGER, Urkunden Altenburg (=FRA II/21, 1865) S. 73-74