Ich Friderich der Vuchs, vnd ich Dyemut sein housvrowe von Stetelndorf tuen chunt allen den, die nu lembtich sint vnd hernach chumftich sint, di den gegenburtigen prief ansehent oder lesent, daz wîer mit vnser chinde gunst vnt aller vnser gerben gutem willen haben gemähte vnser leben ze Steteindorf, da wier ouf sitzen, vnd des selben lehens aigenshaft, di wier ouch chouften datz Hougen von Pergowe, vnserm vreunt, di in aigenleich angehort, vnt da von er vreîleich iz gegeben maht svem er wolt, dem gotshous ze Altenburch durch got vnd vnser vnd ouch aller vnser vodern sel willen mit Hougeins hant, der vor bnant ist von Pergowe, mit alle dem rehte, als er iz gehabt hot in gwer und in gwalt, vnd loben ovch an disem prief, daz wier mit sampt Hougen wellen des selben lehens sherm vnd gver sein, als lants vnd aigens reht ist, ainz vnd dreizzich iar vnd ain tach, vnd wellen iz ouch verantwurtten, svo sin durft geshiht, vnd haben des vnser trew gegeben dem abte vnd seiner sampnunge von Altenburch, vnd haben ouch daz selbe lehen enphangen her wider von dem vorbnanten gotshovs ze rehtem purchreht, vns vnd vnsern chinden, ze fumfzehen phenninge dinsts aller ie^archleich an sant Michels tach, vnd ze anlait fumfzehen vnd ze ablait fumfzehen phenninge, svenne manz verchoufte. Dennoch darvber setz wier demselben gotshous ze Altenburch ovf demselben lehen vnser purchreht ze rehter ebentevr vur zvâi vnd dreizzich phunt vmb daz aigen von Ekkenstain, daz si emaln von vns gechouft heten, vnd wier der selben phenninge des selben aigens, di si vns gaben, an daz selbe lehen, daz wîer in nu hin wider setzzen, leiten paide an aigensapht vnd an purchreht. Daz selbe purchreht setz wier ovch also, ab in an dem vorbnanten aigen ze Ekkenstain iht abgienge, das si der abte vnd sein sampnunge von Altenburch haben ovf vnserm purchreht ze Stetelndorf zwai vnd dreizzich phunt, als êe gesprochen ist. Vnd daz vurbaz daz gantz vnd ste^at sê vnd vnzbrochen, des geb wier vber dis red disen prief dem vorbnanten gotshovs ze Altenburch ze rehter vrchunde, wand wier selbe aigens insigels niht enheten, verinsigelt mit der edeln herren insigel, hern Hougens vnd hern Reimperehts, der zwair Tu^orsen von Lyhtenuels, di dapeî gvesen sint vnd der red gezevg sint, mit andern vrumen leutten, di dapeî warn vnd sin mitsampt in gezevg sint. Daz sint die gezevg: Perhtolt der Sam von Stetelndorf, Hartlieb der Oehsel, vnd Gotfrid vnd sein pruder, Jacob von Ekchendorf, Ulreich der Hedreinstorfer, Vlreich sein svn, Heinreich der Su^etzze, Vlreich von Ebental, Rûedinch von Essenprukke, Hainreich von Wiltperch, Engelpercht von Chrueg, Gotshalich von Vronhoven, Gotshalich sein sun, Hainreich der Dahpekche, Vlreich sein pruder, Engelbreht der Stainpekche, Alber vnd Levtwein von Vuenvelde, Levtwein von Wolfpaizzinge, Alber der Waltkerstainer, Vlreich der Star, Wulfinch von Harrazze, vnd ander vrumer levtte gnueg. Daz ist geshehen vnd ist der prief gegeben nach Christes gepu^erd vber tousent iar, zwaihundert iar, in dem fumf vnd nevncigistem iar, datz Ekchendorf, ze der Mitvasten, an dem Su^entag.

Source Fulltext: BURGER, Urkunden Altenburg (=FRA II/21, 1865) S. 81