Ich Hovch von Pergowe tuen chunt allen den, die nu lembtich sint vnd hernach chumftich sint, die den gegenburtigen prive ansehent oder lesent, daz ich ze Stetelndorf mein lehen, da Fridreich der Vuhs ovf sitzzet, daz mich aigenleich angehort vnd davon ichz vreileich gegeben maht, svem ich wolt, han gegeben dem gotshovs hintz Altenburch mit alle dem reht, als ich iz gehabt han in gwer vnd in gwalt, vnd han mich vereigen der selben aigenschaft des selben lehens, vnd han die geselt ovf sant Lamprehts alter, vnd gegeben ebichleich ze haben mit meiner hant, vud lob an disem prive, daz ich wil des selben vorbnanten lehens sherm vnd gewer sein, als lands vnd aigens reht ist, ainz vnd dreizzich iar vnd ainen tach, vnd wilz ovch verantwurtten, svo sin durft geshiht, vnd han des mein trewe gegeben abte Walchunne vnd seiner sampnumge. Vnd daz vu^erbaz daz gantz vnd stet sei vnd vntzebrochen, des gib ich vber dis rede disen prive dem vorbnantem gotshovs ze Altenburch ze rehter vrchunde versigelt mit meinem jnsigel. Des sint gezevge: her Stepphan von Meissowe, der marshalich in Oesterich, her Hadmar von Hornsperch vnd sein prvder der Hadmar von Rassenloch di Sunberger, her Rapot, her Erchenpreht vnd her Haidenreich di pu^orkcraven von Gars, her Hovche vnd her Reimpercht di Tu^orsen von Lihtenvelse, Perhtolt der Sam von Stetelndorf, Hartlib der Oehsel vnd Gotfrid sein prvder, Jacob von Ekchendorf, Vlreich der Hedreinstorfer vnd Vlreich sein sun, Hainreich der Sutzze, Vlreich von Ebentalle, Ruedinch von Essenprvkke, Hainreich von Wiltperch, Engelbreht von Grueb, Gotschalich von Vronhoven, Gotschalich sein sun, Hainreich der Dahpekche, Vlreich sein prvder, Engelpercht der Stainpekche, Fridereich der Hinderburger, Weichart vnd Otte von Grueb, Alber vnd Levtwein von Vuenvelde, Levtwein von Wolfpaizzinge, Alber der Waltkerstainer, Ulreich der Star, Wulfinch von Harrazze, vnd ander vrumer levtte gnueg. Daz ist geshehen vnd ist der prive gegeben nach Christes gepu^erd vber tovsent iar, zwai hundert iar, indem fumf vnd nevncigistem iar, datz Echendorf, ze der Mitvasten an dem Suntag.

Source Fulltext: BURGER, Urkunden Altenburg (=FRA II/21, 1865) S. 82-83