Ich Weigand vnd ich Gundolt der Reintaler von Ladendorf tu^en chund allen den, die nu lembtich sint vnd hernach chumftich sint, die den gegenburtigen prief ansehent oder lesent, vmb den hove pei der chirchen ze Molt, den emaln vor vier iarn Vlreich vnd Regenbart vnser gesweien von Harrazze verchouft heten vmb sehs vnd zwaintzige phunt phennige dem gotshous hintz Altenburch, vnd des selben hoves nach lands reht vnd nach aigens reht sherm mit in selben, vnd mit ier purgel zwain, mit Hainreichen irm pruder vnd mit Starhanden irm gesweien von Harrazze heten getan, also daz si vier di vorpnant sint, Vlreich vnd Regebart, Hainreich vnd Starhand, verantwu^erten solten daz selbe aigen, vnd sin ouch gewern vnd sherm wern, swo sin durft geshehe vor allem rehtte, ainz vnd dreizzich iar vnd ainen tach, als reht wer, vnd punten sich darzve, swaz an ir ainem abgienge, daz dazselbe gotshous biet den selben shaden gentzlich ovf dem andern; vmb den selben hove vnd vnser ansprach vnd vmb alle vnser reht des selben hoves habe wier vns minchleich vnd gutleich her nach verslihtet mit dem abte vnd mit seiner sampnunge von Altenburch, also mit solcher schaidenhait, daz wier ich Weigand mit meiner chinde guntste, Vlreichs vnd Ortliebs, meiner sun, Margareten, Alhaiden vnd Annen meiner tohter, ich Gundolt, mit meiner housvrowen vron Euen vnd ouch mit meiner chinde, Stephans vnd Niclas meiner sun, vnd aller vnser gerben gutem willen, vns der ansprach vercigen haben vnd ouch des hoves gentzliche mit allem vnserm rehte, vnd des selben chouffe gestatten, darvmb daz vns der abte geit suben phunt phenninge vns vnd vnsern chinden, vnd VIreichen dem Wildekker ain halbez ze leikchouf, vnd ouch daz vnser gesweien von Harrazze pegeben wer den shadens vnd ansprach vmb vnser ebenunge von dem selben gotshovs. Vnd darvmb daz daz geshehen ist, lob wier, daz wier ovch des vorbnanten hoves sherm vnd gewern sein nach lands reht vnd nach aigens reht, mitsampt vnsern gesweien von Harrazze vnd mit ir purgeln, vnd haben des zûe vns ouch zwen purgel gesatzz, hern Ebran von Ernstprunne vnd ouch Vlreichen den Wildekker dem selben gotshovs, datz den daz selbe gotshovs zusampt vns haben sol, swaz im an dem aigen abge. Des hab ouch wier vier zusampt vnsern gesweien vnd zuê ier purgeln vnser glub getan vnd vnser trewe gegeben pruder Andren dem prior von Altenburch, mit dem di ebenunge geshehen ist an seins gotshovs stat, daz wier ohte, di nu vnd vorpnant sint, daz selbe aigen verantwu^orten wellen vnd ouch sherm, swo sin durft geshiht, vor allem rehte ainz vnd dreizzich iar vnd ainen tach, als reht ist, vnd pinten vns darzuê an disem prief, swaz an vnser ainem abge, daz der abte vnd sein sampnunge vnd ier gotshous hab daz selbe gentzlich ovf den andern, denselben shaden vu^erbaz welle wier in ablegen, wier ohte, oder swelich vnder vns denne leben. Vnd daz daz vurbaz immer stet sej vnd vnzebrochen, des geb wier den vorbnanten herren, dem abte vnd seiner sampnunge, vnd ier gotshovs hintz Altenburch disen prief vber disen chouf vnd vber vnser ebenunge vnd vber allez daz glub, daz vor geshriben ist ze rehter vrchunde, versigelt want wier aigens jnsigels niht enhaben, mit hern Haidenreichs des pu^orkcrauen von Gors, mit hern Hermans vnd mit seins pruder hern Hermans vnd mit seins pruder hern Ditreichs von Ladendorf, der dreier edeln herren jnsigel, di sin ouch gezeuge sint, vnd ouch mit hern Ebrans insigel, der vorbnant ist, vnd sin purgel vnd gezeuch ist, mit andern vrumen louten, di dapei gewesen sint, vnd sin ouch gezeug sint. Daz sint die gezeuge: her Stephan von Meissowe der marshalich von Oesterich, her Otte der Chriech von Vreitzlarn, Vlreich der Wildekker, Fridreich von Seuelde, Alber vnd Stepphan von Zwingendorf, Regenbart vnd sein sun Ruger vnd Gotfrid von Harraze, Hauche von Ladendorf, Chunrat der Ebener von Ernstprvnne, Hainreich der Wiltperger, Gotshalich von Vronhouen, Engelpreht von Grueb, Hainreich der Dahpek, Houche von Molt, Otte der Weidner, Stepphan der Polster, Ortolf von Praitenaich, Herbort der Durrenpeke, Otte vnd Ortolf die Mertzen von Chotzendorf, Friderich der Zobel vnd Perhtolt sein pruder, Liebart von Wintpozzinge, Alber der Waltkerstainer, Vlreich der Star vnd ander vrumer lout genuch. Daz ist geshehen vnd ist der prief gegeben datz Neunburch datz dem landetaidinge, vber tousent iar zwai hundert iar, in dem suben vnd nvncigistem iar, des Phintztages var sant Mertains tach.

Source Fulltext: BURGER, Urkunden Altenburg (=FRA II/21, 1865) S. 86-88