Ich Margret von Shiltarn tun chunt allen den, die nu lembtich sint vnd hernach chumftich sint, die den gegenburtigen prive ansehent oder lesent, daz ich han meins aigens, swaz ich het ze Gotweinstorf, iz gestift sei oder niht, cehen shillinge gelts, vnd ovch ze Grevenperge ovf eim halben leben, da Vlreich ouf sitzzet in dem Winchel, ein phunt gelts verchovffet dem gotshovs ze Altenburch vmbe ains mi. dreizzich phunt phennige, mit alle dem rehte als ich iz gehabt han in gwer vnd in gwalt, vnd han daz getan mit meiner chinde hant, mit meins suns Weicharts, vnd mit meiner paider tohter Margreten vnd ovch Osannen, vnd aller meiner gerben gutem willen, vnd han mich vercigen des selben aigens ze Altenburch ovf des guten sant Lamperhts alter ebichleich ich vnd meinev chinde, di vorbnant sint, vnd loben an disem prive, daz wier wellen des selben aigens, daz gelegen ist ze Gotweinstorf vnd ovch ze Grevenperge, daz êe bnant ist, sherm vnt gewern sein, als lands vnd aigens reht ist, ainz vnd dreizzich iar vnd ain tach, vnd wellenz ovch verantwurtten swo sin durft geshiht, vnd haben des vnser trewe gegeben hern Seifriden dem erbern abte von Altenburch vnd seiner sampnunge, ich vnd meinev chinde, vnd ovch Almar mein aidem von Speissendorf, der daz selbe globt hot, swaz vor geshriben stet, mitsampt vns. Vnd daz daz vurbaz gantz vnd ste^at sei vnd vnzbrochen, des geb wier, ich vnd meinev chinde vnd mein erben die nu bnant sint, vber dis red disen prive, dem vorbnanten gotshovs ze Altenburch ze rehten vrchunde, wand wier selbe aigens jnsigels niht enheten, versigelt mit des edeln herren jnsigel hern Stepphans von Meyssowe des marshalichs in Osterrich, den wier darvmbe gepeten haben vnd der der red gezevch ist, mit andern vrumen levten, di dapêi gewesen sint vnd ovch des chovffs gezeug sint mitsampt im. Daz sint die gezeug: her Hadmar von Hornsperch vnd sein prvder der Hadmar von Rassenloch di Sunberger, her Rapot, her Erchenpercht vnd her Haidenreich di purkcraven von Gors, her Chunrat der Gnevsse vom Wolfshove, der Friderich vom Eyreichs, der Wernhart von Plenich, der Otte von Zunkcra, vnd her Otto der Chrich von Vreitzlarn, Hainreich von Wiltperch, Engelpercht von Chrug, Gotshalich von Vronhoven, Gotshalich sein sun, Hainreich der Dachpek, Vlreich sein prvder, Friderich der Hinderburger, Weichart vnd Otte von Grueb, Alber vud Levtwein von Vuenvelde, Levtwein der Wolfpaizzinge, Wolfker der Durrenpekche, vnd Chraft von Gors, Alber der Walkerstainer, Vlreich der Star, vnd ander vrumer levtte gnueg. Daz ist geshhen vnd ist der prive gegeben nach gepu^erd vber tovsent iar zwai hundert iar, in dem suben vnd nevncigistem iar, datz Altenburch, an sant Merteins tag.

Source Fulltext: BURGER, Urkunden Altenburg (=FRA II/21, 1865) S. 88-89