Ich Span vom Wasen tun chunt allen den, di nu lembtich sint vnd hernach chumftich sint, di den gegenburtigen prive ansehent oder lesent, daz ich mit verdahtem mut mein selbes vnd mit meiner paider sune gvnts, hern Levpolts vnd Spans, vnd mit meins pruder hant Rudolfs von Gadme, vnd aller meiner gerben gutem willen, ein lehen ze Strenich, daz mier dint an (ain) phunt phennige an sant Mychels tag, daz mein vreiz aigen gewesen ist, vnd da von ichz vreilich gegeben maht swem ich wolt, han verchovfft dem gotshovs ze Altenburch vmb zwaintz phvnt phenninge Wienner mvnzze, vnd pin des selben gvts gar vnt gentzlichen gewert, vnd hah mich vercigen des selben lehens, ich vnd mein svne vnd mein pruder, di vorbnant sint, mit allem vnserm rehte, vnd haben êz ledichleich ovf gegeben dem erbern manne abte Seifriden von Altenburch vnd seiner sampnunge, dennoch ovch loutterlich durch vnserr sel willen hab wir îz geselt ovf des gutem sant Lamprehts alter, vnserr vrovn vnd den heiligen, di da rastund sint. Swo sin ovch durft geshiht, so welle wir, ich vnd mein sune, daz selbe leben verantwurtten an aller stat vnt sin sherm vnd gewern sein vor allem reht, ainz vnd dreizzich iar vnd ain tach, nach lands sit, als aigens reht ist. Neme ovch daz selbe gotshovs hernach des chovffs icht schaden, den welle wir im ablegen, daz shullen si datz vns immer haben, daz hab wir globt, vnd haben des vnser trewe gegeben; vnd swelcher vnder vns drin, daz pin ich vnd mein zwen svne di hi bnant sint, niht enwer, so gestet daz selbe glub immer gentzlihen ovf den andern, daz wir ovch haben endleich globt. Daz ovch daz vurbaz ebichleich gantz vnd stet seî vnd immer vntzebrochen, des gib ich ze vrchunde disen prive dem vorbnanten gotshovs ze Altenburch versigelt mit hern Erchenprehts jnsigel des pu^orkcraven von Gorshe, vnd mit dem meinem, der diser red gezeug ist, mit andern vrumen levtten, di dapei gewesen sint vnd ovch gezeug sint. Daz sint di gezevge: her Haidenreich der purkcraue von Gorshs, her Hadmar von Rassenloch der Sunberger, her Hainreich von Cheiowe, her Chunrade sein pruder, her Seifrid von Plenich, Ruger der Piber, Hauch von Molt, Ortolve von Praitenaich, Ortolve sein pruder, Otte der Mertze, Ortolve sein pruder, Weichart von Grueb, Otte sein pruder, Almar von Speissendorf, Hainreich der Grelle, Hainreich der Dachpek, Hainreich der Wiltperger, Hainreich vnd Engelbreht sein vetern von Lindenberch, Gotschalich von Vronhoven, Alber von Waltkerstain, Wolfker der Durrenpekche, Vlreich der Star vnd ander vrumer levt gnueg. Daz ist geschehen vnd ist der prive gegeben nach Christes gepurd vber tausent iar zwai hundert iar, in dem nevn vnd nevncigistem iar, datz Altenburch, an sant Vrbans tach.

Source Fulltext: BURGER, Urkunden Altenburg (=FRA II/21, 1865) S. 90-92