Ich Otte der Weidner von Zu^onkcra tun chunt allen den, die nu lembtich sint vnd hernach chumftich sint, die den gegenburtigen prive ansehent oder lesent, daz ich han ze Purchstalle in dem dorfe ein halbez lehen, daz mein rehte aigen was vnd davon ichz vreileich maht gegeben swem ich wolt, verchovfft dem gotshovs ze Altenburch vmbe subun phunt phenninge mit alle dem rehte als ichz gehabt han in gwer vnd in gwalt, vnd han daz getan mit meiner hovsvrovn hant vron Elsbeten, vnd ovch meiner chinde, meiner paider sune Otteins vnd Fridreichs, vnd meiner tohter Ortrunne gunts, vnd aller meiner gerben gutem willen, vnd lob an disem brive, jch vnd mein hovsvrowe vnd meinev chinde diê nu bnant sint, daz wier wellen des selben halben lehens sherm vnd gwern sein als lands vnd aigens reht ist, ainz vnd dreizzich iar vnd ainen tach, vnd wellenz ovch verantwurtten swo sin durft geshiht, vnd haben des vnser trewe gegeben hern Seifriden dem erbern abte von AItenburch vnd seiner sampnunge. Wer aver, daz des ich niht getrowe, daz mein chinde di vorbnant sint, wider ir glub des chovffs niht gedenchen wolten, so han ich vnd mein hovsvrowe Hainrichen den Dachpekchen vnd Hovgen von Molt di zwen ze purgel gesazt dem selben gotshovs, di daz mitsampt vns globt habent vnd sin ir trewe gegeben habent den selben herren, dem abte vnd seiner sampnunge, si sherm mitsampt vns disen chovf, vntz daz vnser chinde gewahsen vnd ier glub mug chraft gehaben, vnd swaz daran abge, daz habe daz selbe gotshovs datz in vnd datz vns, daz welte wier im ablegen. Daz ovch vurbaz daz gantz vnd ste^at sei vnd vntzbrochen, des geb wier vber disen chovf vnd vber vnser glub disen brive, wier vnd vnser purgel di nu bnant sint, demselben gotshovs hintz Altenburch ze einer rehter vrchunde, wand wier selbe aigens jnsigels niht enheten, versigelt mit der edeln herren jnsigel, hern Rapots vnd hern Haidenrichs miner herren der pu^orkcraven von Gors, di wier darvmbe gepeten haben, wier vnd vnser purgel, vnd die sta^etigunge var in, vnd ovch in getan vnd globt haben mitsampt vnsern purgeln, die ovch diser rede gezevg sint, mit andern vrumen levten, di dapei gewesen sint, vnd ovch des chovffs gezevg sint mitsampt in. Das sint die gezeug: her Erchenpreht der pu^orkcrave von Gors, her Hadmar der Sunberger von Rassenloch, her Chunrat der Gnevsse vom Wolfshove, der Wernhart von Plenich, Otte der Chrich von Vreitzlarn, Heinrich von Wiltperch, Engelpreht von Chrug, Gotschalich von Vronhoven, Gotschalich sein sun, Almar von Speissendorf, Fridreich der Hinderburger, Weichart vnd Otte von Grueb, Otte vnd Ortolf di Mertzen von Chotzendorf, Alber vnd Levtwein von Vuenvelde, Levtwein von Wolfpaizzinge, Wolfker der Durrenpekche vnd Chraft von Gors, Alber der Waltkerstainer vnd Vlreich der Star, vnd ander vrumer leutte gnueg. Daz ist geshehen vnd ist der brive gegeben nach Christes gepu^erd vber tovsent iar zwai hundert iar, in dem nevn vnd nevncigistem iar, datz Gors in der purge, an dem Perhtabent.

Source Fulltext: BURGER, Urkunden Altenburg (=FRA II/21, 1865) S. 89-90