Ich Stephan von Meissowe der marschalich in Oesterich tun chunt allen den, di nu lembtich sint vnd hernach chvmftich sint, di den gegenburtigen prive ansehent oder lesent, vmb di haide zwissen Altenburch vnd em Mortgraben vnd Stregen, da Chunrat der Sultzer vmbchrigt gegen dem abt von Altenburch vnd seim gotshovs, vnd im demselben chrig wundet ain laipruder pruder Wernharten ovf derselben haide. Desselben chrigs nach meiner pet liez sich der abte Seifrid vnd sein sampnunge von Altenburch ainthalben, vnd der vorbnant Chunrat der Svltzer anderthalbe gentzlich an alle widerred an mich. Da psiet ich nach vrumer levt rat dem selben gotshovs di haide vnd di waide, daz iz di ebichleich vnd ledichleich an allen chrich haben solt sameê in nvtz vnd in gwer an alle widerrede, vnd daz der selbe abte vnd sein sampnunge Chunrats dez Sultzer guet vreunt weren durch mein willen. Vnd daz vurbaz dis ebnunge stet seî vnd vntzebrochen vnd vmb die haide dhein chrich niht enseî noch immer werd, gib ich disen prive ze vrchunde dem vorbnantem gotshovs ze Altenburch versigelt mit meim jnsigel, vnd pin diser red gezeuge mit andern vrumen levtten, die dapei gewesen sint, vnd sin ovch gezeug sint. Daz sint di gezeuge: her Haidenrich von Gorsh der purkcraue, Hadmar der Sunberger von Rassenloch, der Hagen von Grazze, her Chunrat der Hauslod, der Chunrat Gneusse vom Wolfhove, der Otte Widner von Zunkcra, Hainreich der Dachpek, Hainreich sein sun, Hainreich der Wiltperger, Hainreich sein sun, Alber von Vuenvelde, Levtwein sein pruder, Almar von Speissendorf, Ludweich sein pruder, Hainreich der Grelle, Weichart vnd Otte von Grueb, Gotschalich der junge von Vronhoven, Otte der Mertzze, Ortolf sein pruder, Friderich der Hynderburger, Wolfker der Durrenpek, Alber der Waltkerstainer, Vlreich der Star, vnd ander vrumer levt gnveg. Daz ist geschehen vnd ist der prive gegeben nach Christes gepurd in drevtzehent hundertisten iar, datz Po^elan, an dem svartzen Suntag in der Vasten.

Source Fulltext: BURGER, Urkunden Altenburg (=FRA II/21, 1865) S. 94-95