Ich Heinreich von Wiltperch tun chund allen den, di nu lembtich sint vnd hernach chumftich sint, di den gegenburtigen prive ansehent oder lesent, daz ich mit verdahtem mu^ot mein selbes vnd mit meiner hovsvrovn vron Perhten gvnts vnd vnserr chinde Hainreichs vnd Otteins unserr paider svne, Benedicten, Helenen, Alhaiden, Agnes en vnd Margreten, unserr tohter, vnd aller vnser gerben gvtem willen, han verchovffet ovf ainem hove zê Pu^orchstalle, da Fridreich der Nvzlovber ovf sitzzet, vier vnd viertzige metzen getraides, di man mier dint von dem selben hove, der ouch mein ledich choufaigen gewesen ist, dem gotshovs hintz Altenburch vmbe ohtzehen phunt phenninge Wienner munzze, vnd pin des selben gu^ets gar vnd gentzlich gewert, vnd han mich vercigen des selben hoves, ich, mein hovsvrowe vnd ellev meinev chinde, mit allem vnserm rehte, vnd haben den ovf gegeben ledichleich mit alle dev vnd darzvê gehort, dem erbern manne abte Seifriden vnd seiner sampnunge, vnd wellen ovch des vorbnanten hoves sherm vnd gwern sein, swo sin durft geshiht, ainz vnd dreiz-zich iar vnd ainen tach nach lands sit, als aigens reht ist, ich, mein hosvrowe vnd ellev meinev chinde, di hiê vorbnant sint, daz habe wier globt, vnd haben des vnser trewe gegeben. Darvber dennoch, daz diser chovf dester ste^ater seî, han ich gesetzet zvsampt vns dem selben gothhous drei purgel, Hougen von Molt, Ortolven von Praitenaich den eltern, vnd Chunraten ovch von Molt, di mitsampt vns globt habent, vnd des ir trewe gegeben habent, swaz des chouffes daz selbe gotshous hernach shaden neme, daz si vnd wier im den ablegen. Swaz ovch an vnser ainem aller der, di hie vorbnant sint, daz ist an mier, an meiner housvrovn, an meinen chinden vnd ovch an mein purgeln abge, daz sol immer ez gotshous haben ovf dem andern; also habe wier globt. Vnd daz daz vurbaz ebichleich ste^at sei vnd vntzebrochen, des gib ich ze vrchunde disen prive dem selben gotshous ze Altenburch versigelt, wand ich aigens jnsigels niht enhan, mit des edeln herren jnsigel hern Stephans von Meissowe des marschalichs in Oesterich, meins herren, den ich darvmbe selbe gepeten han, der ovch diser rede gezevch ist mit andern vrumen leutten, die dapei gewesen sint vnd sin ovch gezeugsint. Daz sint die gezeug: her Erchenpreht, her Haidenreich di purkgraven von Gorsh, her Hadmar von Rassenloqh, her Otte der Weidner von Zu^ontkra, Hainreich der Dahpekche, Hainreich sein sun, Otte der Mertze, Ortolve sein pruder, Almar von Speissendorf, Ludweich sein pruder, Hainreich der Grelle, Ortolve der junge von Praitenaich, Friderich der Zobel, Perhtolt sein pruder, Levtwein von Dornech, Perhtolt sein sun, Ditreich von Lehsnitz, Zewis sein pruder, Friderich der Hinderburger, Leutwein von Vuenvelde, Gotschalich der junge von Vronhoven, Weichart von Grueb, Otte sein pruder, Wolfker der Durrenpekche, Alber der Waltkerstainer, Vlreich der Star, vnd ander vrumer levt gnuege. Daz ist geshehen vnd ist der prive gegeben nach Christes gepurde vber tousent iar in dem dritten hundertistem iar, var êm Palmetag des Mantages.

Source Fulltext: BURGER, Urkunden Altenburg (=FRA II/21, 1865) S. 95-96