Wir drei bruder, Alber, Vlreich vnd Wernhart, di Strevnne von Swartzenowe, tun chunt allen den, di nv lembtich sint vnd hernach chvmftich sint, di den gegenburtigen prive ansehent oder lesent, daz wir mit verdahtem mut vnser selber, durch got vnt durch vnser hail, vnt ze trost vnt ze hilf vnsers vater seil, hern Hainreichs, dem ovch got gnade, haben gegeben ain phvnt geltes ovf zwain lehen ze Mýnnepach in dem dorfe, di vnser chovfaigen gewesen sint, dem gotshovs ze Altenburch ledichleich mit allem vnserm rehte, vnd haben daz getan, du wir daz wol getun machten, mit gutlichen willen aller vnser gerben, vnd wellen des selben aigens des vorbnanten gotshovsse scherm sein, swo des durfte geschiht, dreizzich iar, an iar vnd ainen tach, als lands recht ist, vnt haben des vnser trewe gegeben, wir drei, di vor bnant sint, neme ovch daz selbe gotshovs des dhainen schaden, den welle wir im ablegen, oder swelher vnder vns denne lembtiger ist. Vnd daz di rede vu^erbaz stet sei vnt vntzebrochen, des geh wir disen prive ze ainer ebigen vrchunde, versigelt mit vnsern drin jnsigeln. Des sint gezeuge: her Rapot, her Erchenpreht, her Haidenreich, di pu^orkcrauen von Gorshe, her Wulfinch von Slevntz, her Hainreich vnd sein pruder Chunrat von Chyowe, her Chraste vnd sein veter Hadmar von Svnberch, Seifride von Plenich, vnd ander vrume levt gnuch. Daz ist geschehen vnd ist der prive gegeben vber drevtzehen hvndert iar, in dem andern iar nach Chrýstes gepurt, datz Swartzenowe in vnserm hovs, an sant Katherýen tach der edeln chvneginne.

Source Fulltext: BURGER, Urkunden Altenburg (=FRA II/21, 1865) S. 104