Ich Hadmar der Svnnberger ze Asparn vergich vnd tuen chvnt allen den, die disen prief sechent oder horent lesen, di nu sint oder hernach chunftich werdent, daz ich mit gueter gewizen vnd mit zeitigem rat vnd mit guetem gunst vnd willen meiner erwen hern Chrafts ze Zvnnberch, vnd meiner tochter vern Petersen, gegeben hon durch got die aygenschaft an einem hof ze Zoglestorf, der des Julian pu^erchrecht ist vnd dint virzich phennig Wienner, vnd seiner erwen, vreileich vnd ledichleich zue einem selgret vnd zue einer hilf vnserr vadern vnd vnser nachchomen dem erwern conuent ze Altenburch hinz sand Lamprecht, daz mein stiftung ist, vnd pin auch des vergeschriwen aygens rechter scherm nach lands recht hie ze Osterreich. Vnd daz daz furwaz vnzeprochen vnd stet peleib, des gib ich in disen prief versigelten mit meinem jnsigel vnd mit meins svns jnsigel herrn Chrafts ze Svnnberch vnd mit hern Otten jnsigel des Tuersen an meiner tochter stat, vern Petersen. Vnd diser sach sind zeug: her Rapot der purgraf ze Gars, her Erchenger, her Haidenreich, her Hainreich von Cheiaw, her Hadmar der Svnnberger von Raschenlach, her Chunrat von Cheiaw, vnd ander vrum leut genug. Der prief wart gegewen nach Cristes gepurd vber dreuzechen hundert jar, darnach vber svben jar, an dem andern Sventag nach Ostern.

Source Fulltext: BURGER, Urkunden Altenburg (=FRA II/21, 1865) S. 114-115