Ich Hadmar der Svnnberger von Raschenla vergich vnd tuen chunt allen den, die disen brief lesent oder horent lesen, die nu sint oder hernach chunftich werdent, daz ich mit guetem willen meiner hausvrowen, vern Reichkarten, vnd mit ganzer stattung meiner erben hon gegeben dreu phunt phennich gelts Wienner ze Mannlewarn, mit pu^erchrecht mit alle, vnd einen weingarten ze Pulka aigenleich vnd ledichleich dem haus ze Altenburch sand Lamprecht vnd allen den heligen, di do rastund sint, lauterleich durch got vnd durch selgret meiner vodern vnd meiner nachomen, vnd meinem svn hern Albern dem Svnnberger ze fuedrung vnd ze pezrung, der doselb conuentpruder ist, vnd auch do got dienen schol vnz an sein end mit rechter gestleicher gehorsam. Ich Hadmar der Svnnberger von Raschenla mitsampt meinen erben lob dem vorgenanten conuent ze Altenbu^erch vber daz vorgeschriben guet, daz ich im gegeben hon, rechten scherm fuer elle ansprach, nach gebonhait vnd nach landes sit ze Osterreich. Vnd daz dise gab stet vnd ewich peleib, des gib ich in disen prief versigelten mit meinem jnsigel, vnd mit meins pruder her Hadmars des Svnnberger von Asparn jnsigel. Diser sach sind zeug: her Rapot der pu^ergraf ze Gars, her Erchenger, her Haidenreich, her Hainreich von Cheiaw, her Chuenrat von Cheiaw, Fridreich Hinderburger, Hainreich Weinperger ze Holabrunn, Hainreich in dem Prunnthal, Chu^enrat in dem Prunntal, vnd ander frum leut genu^eg. Diser prief wart gegeben nach Christes gepu^erd vber dreuzechen hundert jar, dornach in dem sechsten jar, an sand Veits tag.

Source Fulltext: BURGER, Urkunden Altenburg (=FRA II/21, 1865) S. 114