Ich Reinprecht gehaizzen der Tu^ers von Liechtenvells, dienstherr in Osterreich, tu^en chunt an disem brief allen den, di in sehent oder ho^erent lesen, baid di nu lebent oder hernach chunftig sint, daz ich mit wol verdachtem mu^et mein selbs, vnd mit gutem willen meiner housvrowen vron Breiden vnd meines suns Reinprechts, vnd meiner to^echter Kathrein, Elspeten vnd Geutten, vnd anderr aller meiner geerben, durch recht no^etdurft, wand ich vil gelten scholt, verchoufft han acht pfunt gellts den geistleichen vrowen datz Sant Bernhart, meines rechten erib vreyen aigens, Wienner munnzz, vm hundert pfunt vnd vmb zwai pfunt beraiter pfenning derselben munzz, der ich ouch aller scho^en vnd gentzleich gewert pin. Derselben gullt ligent sechsthalb pfunt datz Hard, vnd dritthalbs datz Flachow. Vnd han ich ouch diselb gullt ledichleich oufgegeben den vorgenanten frowen vnd irm chloster datz Sant Bernhart mit allem dem recht, vnd ichs gehabt han vnd von meinen vo^ervo^ern herpracht. Daruber gelob wir drei, ich der vorgenant Reinprecht vnd ich Hug der Tûrs von Liechtenvells, vnd ich, Haeinreich desselben hern Hougen sun, daz êegeschriben gu^et schermen vnd freien den vorgenanten frowen, als des lands recht vnd gewonhait ist in Osterreich; also swelhen schaden di selben frowen nemen an dem vfft genanten gu^et in aeins vnd dreizzich iarn mit rechtem recht, denselben schull wir in ablegen gentzleich an alle ariglisste, vnd swaz in des an vnser ainem abget, daz schulten si ie ouf den andern haben. Vnd zu einer ewigen gewishaeit dits dings, so geb wir drei den selben vrowen vnd irm chloster datz Sant Bernhart disen brief, versigelten mit vnser aller dreier insigel, vnd mit vnsers o^ehems insigel, hern Stephans von Meyssaw. Des sint gezeug: her Leutolt vnd her Alber von Chunring, her Vlreich von Meyssaw, her Hadmar von Asshparn, her Hadmar von Holebrunne, her Wulfinch von Sleuntz, her Chraft, di Sunnberger, vnd anderr herren vnd frumer laeut genu^eg. Dits dinch ist geschehen vnd der brief ist gegeben datz Chrumnow ouf dem hous, do von Christs gepurd ergangen warn dreutzehen hundert iar, darnach in dem achten iar, an sant Thomans abent.

Source Fulltext: BURGER, Urkunden Altenburg (=FRA II/21, 1865) S. 119-120