Ich Engelprecht der Fuchs von Haselberch vergich vnd tuen chunt allen den, di nu sint oder hernach chumftich sint, daz ich mit wol verdachtem muet vnd mit zeitigem rat mein vnd meiner hausvrowen, vrowen Prangueten (sic), vnd meiner paider sune Seibotes vnd Engelprechtes, vnd meiner tachter vern Offemein, vnd aller meiner gerwen, verchauft han dem erwern herren, hern Haidenreichen dem purkrauen von Gors, als das aigen, das ich vnd mein vorvodern an all ansprach gehapt haben ze Owern-Neliwe, das ist vier phunt geltz vnd zwen vnd viertzeg phenneng geltz, vm phumf vnd funtzege phunt vnd vm drei schilling Wienner phenneng, der ich aller recht vnd redleich gewert pin, vnd wil auch ich, vnd mein sune Seibot vnd Engelprecht, des vorgenanten aigens rechter scherm sein nach aigens recht vnd nach lantes gewonhait hie ze Ostereich. Vnd auch durich pessar sichervng han ich zu mier vnd zu meinen vorgenanten sunen genumen Weicharten den Grueber vnd Gotschalichen von Vronhouen ze scherm des vorgenanten guetes dem vorgenanten herren, hern Haidenreichen, vnd swem er is geit, ob er oder swem er is geit, dehainen schaden nêmen, den schollen sev mit mir vnd mit meinen gerwen ablegen im, oder swem er daz selbe guet geit. Vnd han ich in darvm auch ewentevr gesatzet, swaz ich gechauft han wider Chunraten den Gaul vnd seinen prueder Weicharten datz Haselberch, vm die vorgenanten phenneng, also peschaidenleich, ob die Zendell mein geswein des vorgenanten aigens scherm sein wellent mit mier vnd mit meinen sunen, so ist der vorgenant Weichart der Grueber vnd Gotschalich von Vronhouen vnd auch dev ewentevr ledich. Vnd daz dev red vnd dev sach stet vnd vnzeprochen ewichleichen peleiwe, gîb ich Weicharten dem Grueber vnd Gotschalichen von Vronhouen, die ee genant sint, disen prief, versigelt mit meines herren jnsigel hern Haidenreichs des purkrauens von Gors, vnd mit meinem jnsigel. Der red vnd der schach zevg sint: her Rapot vnd sein sun der AIlber purkrauen von Gors, her Hademar der Sunwerger von Raschenlach, Almar von Pevgen vnd sein sun Alber von Speissendorf, Dietreich von Sand Marein, Hainreich der Dachpech vnd sein prueder Vlreich vnd Chunrat, vnd Hainreich von Dapach, der Zewis von Fukkla, vnd anderr pidiber laut genuech. Die sach ist geschechen vnd ist der prief gescriben, du von Christ puert wor ergangen drevtzehen hundert jar, darnach in dem zwelften jar, an sand Cholmans tag.

Source Fulltext: BURGER, Urkunden Altenburg (=FRA II/21, 1865) S. 130-131