Ich Ditreich hern Wolfgang sun ze Neundarf, vnd ich wer Kathrei sein hausvrow, wir vergechen vnd tuen chunt allen den, die disen prief lesent oder horent lesen, die nu sint oder hernach chunftich werdent, daz wir mit guetem willen vnserr erwen, vnd mit zeitigem rat vnserr vriunt, vnsers vrein aigens subenzechen schilling phennich gelts ze Strench, die da selb ligent auf ainem lechen vnd auf funf hofsteten, auf vberlent, weingarten, paungarten, datz Wartperch drithalb phunt phennich gelts, allz vnsers vrein aigens, daz da selb leit auf anderthalwen lechen vnd auf einer hofstat, den edeln erwern herren, hern Rapoten pu^ergrauen ze Gors, mein hern Haidenreichen seinem pruder, redleich vnd recht verchauft hawen, in vnd ieren erwen oder swem siz wellen gewen, vm hundert phunt zwai vnd virzich phunt phennig Wienner muniz, der wir all von in recht vnd redleich gewert sein. Vnd daz selb guet mit guetem vnserm willen, ob in sein durft werd, oder wem si iz gewen, schallen sev verchauffen, versetzen, allen ieren vrumen damit ze schaffen, ze geleicher weis, als mit ir vreim guet. Wir lowen auch mitsampt hern Wolfgangen meinem vater, zden zeiten pu^ergraf ze Chunring, mit Nyclasen von Durrenpach, meinem ochem, den vorgenanten herren vm die vorgenanten gult rechten scherm fu^er ellev ansprach, nach aigens recht vnd landes gewonhait ze Osterreich. Vnd daz diser chauf stet vnd unzeprochen weleib, des geb wir in disen prief zue einer offen vrchund, versigelten mit vnserm vnd mit meins vater hern Wolfgang vnd Nyclas von Durrenpach insigel, den der chauff wol chund ist. Diser sach sint zeug: her Hainreich von Cheiaw, her Chu^enrat sein pruder, her Alber von Schonwerch, her Hadmar sein pruder, her Rudger der Pyber, her Fridreich von Durrenpach, der Wernhart von Plench, der Ott der Weidner, Ott sein svn, Gotschalich von Vrownhouen, Hertel der Gneus, vnd ander vrum leut genug, den iz wol chund ist. Der prief wart gegewen ze Gors nach Cristes gepu^erd vber dreuzechen hundert jar, in dem dreizechten iar, an dem Phingsttag.

Source Fulltext: BURGER, Urkunden Altenburg (=FRA II/21, 1865) S. 132-133