Ich Chvnrat von Cheyawe vergich vnd tvn chvnt allen den die disen prief lesent oder horent lesen, die nv lebent vnd hernach chvnftich sint, daz ich mit gutem willen vnd mit verdachtem mvte zv der zeit, do ich iz wol getvn mochte, verchauft han meines rechten aigens mein waide, die ich gehabt han ze Retzpach, ze rechtem purchrechte meinen holden datz Retzpach vmb drev phvnt Wienner phenninge, der ich recht vnd redlichen gewert pin, also beschaidenleichen, daz sie furbaz mir vnd meinen erben dienen svln alle jar ewichleichen an sand Jorgen tage sechzich Wienner phenninge ze rechtem purchrechte nach des landes recht ze Ostereich. Vnd darvber durch pezzer sicherhait so setzzen wir vns, ich vnd mein erben, vber die egenante waide datz Retzpach meinen holden datz Retzpach ze rechtem scherm fur alle ansprache, als purchrechtes recht ist vnd des landes recht ze Ostereich, vnd gib jn darvber disen prief zv ainem offen vrchvnde vnd zv ainem waren gezevge vnd zv ainer ewigen vestnvnge diser sache, versigilten mit meinem jnsigil. Diser prief ist geben ze Wienne, da von Christes geburt waren ergangen drevtzehen hvndert jar, jn dem sechzehenten jare, darnach des Vreitages in der Phingistwochen.

Source Fulltext: BURGER, Urkunden Altenburg (=FRA II/21, 1865) S. 139