Ich Marchhart von Caelking vergih vnd tvn chvnt allen den, di disen brief lesent oder hoerent lesen, di nv lebent vnd hernach chvnftig sint, daz ich mit verdahtem mvet vnd mit rat vnd mit gvetem willen meiner hovsvrovn, vron Margreten, vnd mit willen der andern meiner erben, zv der zeit, dv ich iz wol getvn moht, han verchovffet reht vnd redlich meins erbaigens ein lehen, daz ze Wartperg gelegen ist vnd dient zwelif schilling pfenning Wienner mvnezze, mit allem geschaefte, mit allem dem, daz ze dem saelben lehen gehoert, ze vaelde vnd ze dorffe, wie daz genant ist, versvecht vnd vnversvecht, dem erbern herren, hern Haidenreichen, dem pvrchgrafen von Gors, vnd seinen erben, vmb fvmf vnd zwaintzig pfvnt pfenning Wienner mvnezze, der ich gar vnd gaentzlich gwert vnd verriht pin, ledichleich vnd vreilich ze haben, vnd allen iren fromen damit ze schaffen, verchovffen, versetzen vnd geben, wem si iz geben wellen, an allen meinen vnd aller meiner erben irresal. Vnd doch zv einer bezzern sicherhait, jch Lvdweiche der alt von Caelking, vnd ich vorgnanter Marchhart sein svn, vnd ich Lvdweichc sein svn, vnd ich Meinhart sein svn, setzen vns dem vorgnanten hern Haidenrichen, dem pvrchgrafen von Gors, vnd seinen erben vnd ovch den, wem si daz vorgenant lehen verchovffent, setzent oder gebent, ze rehtem scherm vnd gweren vber daz oftegnant lehen ze Wartperg, vnd vber allez daz, daz darzve gehoert, fver alle ansprach nach des landes reht vnd gewonhait hie ze Oesterrich. Vnd darvber ich vorgnanter Marchhart von Caelking gib disen brief dem êgenanten herren, hern Haidenreichen, dem pvrchgrafen von Gors, vnd seinen erben, vnd avch den, wem si daz vorgnant lehen gebent, zv einem waren gezivge vnd zv einer ebigen vestenvng diser sache, versigelten mit meinem insigel, vnd mit meins herren, meins vater hern Lvdweigs von Caelking insigel, vnd mit meins prveder Lvdweigs insigel. Vnd sind ovch diser sache gezivge: her Rapot pvrchgraf von Gors her Dietrich van Wolfkerstorf, her Chvnrat von Cheýov, her Wulfinch vnd her Alber von Pvechperchc, her Alber pvrchgraf von Gors, vnd ander frvm levt genveg, den disiv sache chvnt ist. Vnd ist diser brief gegeben, dv von Christes gebvrt waren ergangen drivtzehen hvndert iar, darnach in dem ahtzehenden iar, an sand Cholmans tag.

Source Fulltext: BURGER, Urkunden Altenburg (=FRA II/21, 1865) S. 140-141