Ich Rapot vnd ich Haidenreich purchgrafen von Gors veriehen vnd tvn chvnt allen den, di disen brief lesent oder hoerent lesen, di nv lebent vnd hernach chvnftig sint, daz wier an vnseren lesten zeiten, mit verdahtem mvet vnd mit gvetem willen aller vnser erben, wolmachtich dennoch vnserre sinne vnd vnserre rede, dvrch di liebe vnsers herren vnd dvrch vnserre vodern sele willen, vnd dvrch herrn Albers sele willen, vnd ovch dvrch vnser saelbes hailes willen, haben geschaffet vnd gegeben dem gotshovse ze Altenbvrch vnd der samnvnge des saelben gotshovses vnseres rehten aigens, allez vnser gvet, daz wir in vrbar gehabt haben ze Obernretzpach, ze vaelde vnd ze dorffe, gestift vnd vngestift, versvecht vnd vnversvecht, wie iz genant ist, vnd ze Wartperge zwelif schilling gaeldes, mit allem dem nvtze vnd ovch rehte, als wir iz in aigens gwer herbraht haben, dem vorgnanten gotshovse ze Altenbvrch vnd der samnvnge, div dasaelbe got taeglich dient, hinfver ledichlich ze haben, vnd allen iren frvmen damit ze schaffen, ze verchovffen, ze versetzen, vnd ze geben wem sie wellen, als iz in allerbeste chvm vnd fveg, an allen irresal von vns vnd von vnseren erben, vnd getrovn in des wol, daz si got biten vmb vnser vodern vnd vmb vns, vnd vns tailhaeftig machen aller gveten ding, di si da begent mit ir reinen andaht. Vnd darvber dvrch ein bezzer sicherheit setze wir vns vber daz vorgnant gvet ze Obernretzpach vnd ze Wartperge, als iz e benant ist, dem vorgnanten gotshovse ze Altenburch vnd der samnvnge des saelben gotshovses ze rehtem sherm vnd gwern des e benanten gvetes, fver alle ansprach von vns vnd von vnseren erben, als scherms reht ist vber aigen in dem lande hie ze Oesterreich. Vnd daz disiv gabe vnd disiv rede also staet beleibe vnd vnzebrochen von vns vnd von vnseren erben, darvber geb wier dem vorgnanten gotshovse ze Altenburch vnd der samnvnge des saelben gotshovses disen brief zv einem waren gezivge vnd zv einem sihtigen vrchvnd vnd zv einer ebigen vestenvnge diser sache, versigelten mit vnseren insigelen. Der gegeben ist ze Gors, dv von Christes gebvrt waren ergangen drivtzehen hvndert iar, darnach in dem nevntzehenden iar, an vnser vrovn tag ze der schidvnge.

Source Fulltext: BURGER, Urkunden Altenburg (=FRA II/21, 1865) S. 145-146