Ich Chvnrat von Cheýov vergih vnd tvn chvnt allen den, di disen brief lesent oder hoerent lesen, di nv lebent vnd hernach chvnftig sint, daz ich mit verdahtem mvet vnd mit gvnst meiner erben zv der zeit, dv ich iz wol getvn moht, han verchovffet reht vnd redleich meines erbaigens allez mein gvet, daz ich gehabt han in vrbar ze Obernretzpach, an mein groezzer weingart ist ovzgenomen, iz sei ze vaelde oder ze dorffe, gestift vnd vngestift, versvecht vnd vnversvecht, wie iz genant ist, den erbern herren, hern Rapoten vnd hern Haidenreichen, den purchgrafen von Gors, vnd iren erben, vmb zwai hvndert pfvnt pfenning vnd vmb vier vnd dreizzig pfvnt pfenning Wienner mvnezze, der ich gar vnd gaentzlich gwert pin, den erbern herren, hern Rapoten, vnd hern Haidenreichen, vnd allen iren erben, fverbaz ledichleich vnd vreilich ze haben, vnd allen iren frvmen damit ze schaffen, versetzen vnd verchovffen vnd geben, wem si wellen, als iz in allerbeste fvege, an allen irresal von mir vnd von meinen erben. Vnd darvber dvrch ein bezzer sicherhait, ich vorgnanter Chvnrat von Cheýov, vnd ich Hainreich von Cheýov, vnd ich Dietrich von Wazzerberch, setzen vns vber daz vorgnant gvet allez ze Obernretzpach, als iz ebenant ist, den erbern herren, hern Rapoten vnd hern Haidenreichen, den pvrchgrafen von Gors, vnd allen iren erben, ze rehtem scherm vnd gwern des ebenanten gvetes, fver alle ansprach von vns vnd von vnseren erben, als schermes reht ist vber erbaigen in dem lande hie ze Oesterreich. Vnd daz disiv rede vnd diser chovf also staet vnd vnzebrochen beleibe, darvber so geb wir, di vorgnanten, ich Chvnrat von Cheýov, vnd ich Hainreich von Cheýov, vnd ich Dietreich von Wazzerberch, den erbern herren, hern Rapoten vnd hern Haidenreichen, den purchgrafen von Gors, vnd allen iren erben, disen brief zv einem waren gezivge vnd zv einem sihtigen vrchvnde vnd zv einer ebigen vestenvnge diser sache, versigelten mit vnseren insigelen. Vnd sind ovch diser sache gezivge dise erbern herren, di herrnach geschriben sint: her Ortlieb vnd her Hadmar von Winchel, her Alber von Chvnring, her Vlreich von Mýssov, her Hadmar vnd her Chraft von Svnneberche, her Seifrid von Plaench, vnd ander frvm levt genvege, den disiv sache chvnt ist. Diser brief ist gegeben, dv von Christes gebvrt waren ergangen drivtzehen hvndert iar, darnach in dem nevntzehenden iar, an sand Jacobes tag.

Source Fulltext: BURGER, Urkunden Altenburg (=FRA II/21, 1865) S. 144-145