Ich Chraft von Svnnenberch vnd ich Katrei sein havsvrowe, vnd ich Otte der Tversse von Ravhenekke vnd ich Peters sein havsvrowe, wir veriehen vnd tvn chvnt allen den, die disen prief lesent oder horent lesen, di nv lebent vnd hernach chvnftich sint, daz wir mit vnser erben gvtem willen vnd gvnst, mit verdahtem mvte vnd mit gesamter hant, zv der zeit do wir iz wol getvn mohten, lavterlich dvrch got vnd dvrch vnser vodern sel willen, vnd avch dvrch vnser selber sel hail, avfgegeben haben die aigenschaft aines lehens, daz da leit datz Rosbize, vnd swaz darzv gehoret, swie so iz genant ist, vnd daz Albers chint von Hadmarstorf von vns ze lehen gehapt habe, dem spital ze Altenbvrch, daz hern Hadmars stiftvnge von Svnnenberch, dem got gnade, gewesen ist, mein vorgenanten Chraften vater von Svnnenberch also beschaidenleich, swer das selbe aigen hat, daz der davon dienen sol dem vorgenanten spital ze Altenbvrch ewichleichen alle iar an sand Michels tage sechzich Wienner phenninge zv rechtem pvrchrehte, vnd chainen andern dienst mer. Vnd darvber dvrh pezzer sicherhait, so settzen wir vns, ich Chraft von Svnnenberch vnd ich Katrei sein havsvrowe, vnd ich Otte der Tversse von Ravhenekke vnd ich Peters sein havsvrowe, vnverschaidenlich dem vorgenanten spital zv Altenbvrch vber die aigenschaft des vorgenanten lehens vnd swaz dar zv geboret, swie so iz genant ist, zv rehtem gewer vnd scherm fvr alle ansprach, als aigens reht ist vnd des landes reht ze Osterreich. Vnd geben avch wir dem vorgenanten spital ze Altenbvrch disen prief zv einen offen vrchvnde vnd zv einem waren gezevge diser sache, versigelten mit vnsern jnsigiln. Diser prief ist geben ze Wienne, do von Christes gebvrt waren ergangen drevzehen hvndert iar, in dem ain vnd zwaintzgisten iar, darnah des nahsten Mittichens vor sand Mathes tage.

Source Fulltext: BURGER, Urkunden Altenburg (=FRA II/21, 1865) S. 152-153