Ich Wulf von dem Gerlas vergib vnd tuen chunt an disen gegewuertigen prief allen, di in lesent vnd hoerent lesen, daz Heinrich von Muelveld mein diener vnd seinev chint vnd sein erben verchauft haben den hof ze Muelveld dem erbern herren apt Heinrich von Altenburch vnd der samenung vmb sehs pfunt Wienner pfenning, vnd swo daz Heinrich der vorgenant vnd seineu chint vnd sein erben vuerbaz widerreden wolten, so wil ich Wulf von dem Gerlas der verchauffung gezeuch sein. Vnd darveber so gib ich disen prief, versigelt mit meim insigel. Der prief ist gegeben des Mittechens vor dem Palmentag, in dem iar, do von Christes geburd waren ergangen dreuzehen hundert iar, darnach in dem ein vnd zwainzzigstem iar.

Source Fulltext: BURGER, Urkunden Altenburg (=FRA II/21, 1865) S. 153