Ich Symon Hierzzen svn von Newen- Polan, vnd ich Gotfrid sein svn, vnd ich Jans sein svn, vnd Agnes sein tochter, wier veriehen vnd tuen chvnt allen den, die disen brief ansehent vnd horent lesen, di nv lebent vnd hernach chvnftich sint, daz wier mit guetem willen vnd mit zeitigem rat vnd gvnst aller vnser erben vnd vrevnd, ze der zeit, do wir ez wol getven mochten vnd wolden, verchauft haben ein halbez phunt phenning gelten Wienner mvnzze vnsers rechten aigens vnd daz vnser rechtez chaufguet ist, vnd leit das vorgenant halbez phunt phenning geltes auf einem lechen daz Swarczenrevt, und sitzet auf dem selben lehen Ott Rvedolfs svn von Smerbach, vnd das selb halb phunt geltes dint man an sand Michelstag; daz vorgenant guet hab wir gegeben ze chauffen dem erbern herren hern Hainreich, ze den zeiten apt datz Altenbverch, vnd dem conuente des selben gothshaus vmb achtedhalb phunt Wienner phenning, der wir recht vnd redleichen gewert sein, mit allem dem recht vnd nvtze, als wier ez gehabt haben. Vnd loben auch mit vnsern trewen, das wier des vorgenanten guets recht scherm sein fuer alle ansprach, als des landes recht vnd gewonhait ist in Osterich, allen den schaden, den si doran nemen mit dem rechten, den sullen si haben auf allem dem guet, daz wier haben an dem lant datz Osterich. Daz disev rede stet, gantz vnd vnzebrochen beleib, geb wier in disen brief, vnd wann wier nicht aigens jnsigels haben, versigel wir in disen brief ze einem waren vrchvnd vnd zv einer ewigen vestnvng diser sache mit der erbern pvrger insigel von Neuen-Polan, vnd zv einer pezzern sicherheit mit des erbern herren insigel hern Vlreiches von Meyssaw, des marschalhes in Osterich, der ze den zeiten vnser rechter here was, vnd di sach vor im vericht vnd bestett ward, vnd mit des erbern heren insigel hern Hadmars des jvngen Svnnberger von Schawenstain, di der sach gezeug sint mitsampt ieren insigeln. Diser sach sint gezeug: Chvnrat der Bersenslager, Vlreich von Drakendorf, ze den zeiten des schreiber von Meyssaw, vnd Almar ze den zeiten richter datz Vusperch, vnd Alber sein svn, vnd Hainrich von Dachpach, Dietreich von Sand Marein, ze den zeiten richter datz Polan, Rudolf von Vukla, vnd ander erber leut genvech, den di sach chunt vnd gewizzen ist. Der brief ist gegeben nach Christi gebuerde vber drevtzehen hundert jar, dornach in dem zway vnd zwainkisten jar, an sand Johans tach ze Svnnbenten.

Source Fulltext: BURGER, Urkunden Altenburg (=FRA II/21, 1865) S. 155-156