Ich Vlreich van Meyssaw, obrister morschalich in Östereich, vergich vnd tuen chund allen den, di nu sint oder hernach chunftich werdent, di den prief lesent oder horent lesen, daz ich durich di andacht vnd durich di grozzen lieb, di ich hon zu dem gotzhaus vnd zu der sampnung datz Altenburch, gegeben hon dem selben gotzhaus, lauterlich durich gotze hilfe vnd ze trost meiner sel vnd aller meiner vodern sel, mit guetem willen mein, vnd meiner hausvravn, vron Anne, vnd meiner chind, meiner svn, meins Stephans vnd Hainreichs vnd Otten, Wernharts vnd Chvnrats, vnd meiner tochter vron Sophein, vnd mit gueter gunst aller meiner erben, meins rechten chaufaigens on sechzechen phenning sechsthalb phunt phenning gelts Wienner mvniz, di ich chauft hon datz Meinharten van Pulka mit guetem willen seins prueder Gabrihels, vnd seiner swester vron Marigreten, vnd aller seiner erben, vmb hvndert phunt phenning Wienner mvniz, der ich in aller recht vnd redleich gewert hon. Vnd leit daz vorgnant gult auf zwelif bestiften lechen datz Radigestorf, vnd auf drin bestiften lechen datz Chvenreut, di man ierlich dient an sand Michels tag. Vnd schol daz gotshaus datz Altenburch mit dem vorweschriben guet allen seinen frum schaffen on allen irrsal. Ich wil auch des selben guetes rechter scherm sein mitsampt meinen erben fuer alle ansproch noch aigens recht vnd des landes gwonhait in Osterreich. Daz di red vnd di sach stet vnd vnzeprochen ewichleich peleib, gib ich dem gotshaus datz Altenburch den prief ze einer sichtigen vrchund, versigelt mit meim jnsigel. Der sach zeug sint: der erber herr grof Perichtolt van Maidburch, her Chraft van Svnnberch, her Seyfrid der Plenicher, her Leutolt van Chvnring, her Engelschalich der Waltschrot, Reibot van Peugen, Alber van Marichartstorf, vnd ander piderb leut gnuech, den di sach wol chund ist. Der prief ist geben datz Chrvmnaw, nach Christ purt vber dreutzechen hundert iar, dornach in dem fvmf vnd zwantzgisten jar, an vnser vrawn tag.

Source Fulltext: BURGER, Urkunden Altenburg (=FRA II/21, 1865) S. 167-168