Ich Jans der Tvrs van Rauchenek vnd ich Katrey mein havsvrav mitsampt vnsern erben veriechen offenlich an disem prief allen levten, di nv lebent oder hernach chvnftig sind, daz Alram van dem Aygen vnd sein havzvrau, vnd ir paider erben, habent van vns ze lehen gehabt ain pfvnt Wienner pfenning gelts vnd zehen phenning, daz do leit datz dem Aygen auf vberlent; die selben aigenschaft geb wir, ich eegenanter Jans der Tvrs vnd ich Katrey mein havsvrav mitsamt vnsern erben hintz Altenburch avf vnser vravn alter also weschaidenlich, datz der eegenant Alram vnd sein havsvrav vnd ir erben daz eegenant gelt van dem eegenannten gotshavs fvrbaz ze rechtem pvrchrecht haben schollen, als anders pvrchrechts recht ist in Oesterich, vnd jerlich davan dien vir pfenning Wienner mvniz. Sev svllen avch mit dem ee genanten pvrchrecht vurbaz alle ir frvmen schaffen, versetzen, verchaufen oder geben, wem sev wellen, an alle irsal. Daz disev red fvrbaz stet vnd vnchebrochen weleib, gib ich in disen prief versigelt mit mein jnsigl. Der gegeben ist nach Christes gepvrd drevzehen hvndert jar, darnach in dem acht vnd dreizzigistem jar, an sand Veitz tag.

Source Fulltext: BURGER, Urkunden Altenburg (=FRA II/21, 1865) S. 198-199