Guido miseratione diuina sancte Cecilie presbyter cardinalis, apostolice sedis legatus, dilectis in Christo abbati et conuentui monasterii sancti Lamberti in Altenburga, ordinis sancti Benedicti, Patauiensis dioecesis, salutem in domino. Illas peticiones ad exauditionis graciam admittimus non indigne, per quas ecclesiarum et monasteriorum vtilitati consulitur, et personarum necessitatibus prouidetur. Exhibita siquidem nobis vestra peticio continebat, quod fructus, redditus et prouentus officii camere, ex quo vestimenta consueuistis et debetis percipere et habere, ad prouidendum vobis de vestibus monasterii vestri predicti sunt adeo tenues et exiles, quod secundum vestri status decentiam nullatenus sufficere dinoscuntur, nec ex ipsis propterea vobis incumbentia onera supportare, propter quod nobis humiliter supplicastis, ut vobis in hac parte paterno compacientes affectu prouidere super hoc de oportuno remedio misericorditer dignaremur et parochialem ecclesiam apostolorum Petri et Pauli in Stregen dicte Patauiensis diocesis, in qua ius patronatus habere vos dicitis, prelibato officio vnire et incorporare de speciali gracia dignaremur. Nos igitur de predictis debita informatione recepta volentesque vobis super premissis quanto salubrius possumus prouidere, predictam parochialem ecclesiam apostolorum Petri et Pauli in Stregen dicte Patauiensis diocesis cum omnibus iuribus et pertinentiis suis, prefato officio camere monasterii vestri prelibati, auctoritate qua fungimur presentium tenore vnimus, incorporamus, ac in perpetuum annec-timus, jta quod cedente vel dedecente rectore ipsius ecclesie qui nunc est, uel ecclesia ipsa quocunque alio modo vacante liceat vobis et successoribus vestris qui pro tempore fuerint, predictam ecclesiam apostolorum Petri et Pauli cum iuribus et pertinentiis suis, et corporalem possessionem eiusdem ingredi, ac etiam libere apprehendere et tenere, ipsiusque fructus, redditus et prouentus in proprios usus conuertere, consensu alterius cuiuscunque minime requisito, prouiso quod dicta ecclesia debitis obsequiis non fraudetur, sed faciatis ibidem prout oportunum extiterit et est, alias fieri consuetum deseruiri laudabiliter in diuinis. Nulli ergo omnino hominum liceat hanc paginam iure vnionis, incorporationis et annexionis infringere uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum apud Znoymam Olumucensis dioecesis IV. Nonas Septembris, pontificatus domini Clementis VI. pape anno octavo.

Source Fulltext: BURGER, Urkunden Altenburg (=FRA II/21, 1865) S. 229-230