Guido miseratione diuina sancte Cecilie presbyter cardinalis, apostolice sedis legatus, dilecto in Christo abbati monasterii sancte Marie in Zwetla, Patauiensis diocesis, salutem in domino. Petitio dilectarum in Christo abbatis et conuentus monasterii sancti Lamperti in Altenburga, ordinis sancti Benedicti, Patauiensis dioecesis, nobis exhibita continebat, quod monasterium eorum predictum, tam propter onera debitorum, quam propter alia eidem incumbentia est adeo deductum ad inopiam, quod ex officiis camere nec non infirmarie ipsius monasterii tui non sunt aliqui redditus deputati, non potest monachis pro uestitu neque egrotantibus et infirmis pro eis necessariis prouideri. Propter quod nobis humiliter supplicarunt, ut eisdem paterno compatientes affectu deberemus super hoc de oportuno remedio prouidere, et parochiales ecclesias sancti Michaelis in Rorenbach, et apostolorum Petri et Pauli in Stregen, dicte Patauiensis dioecesis, in quibus jidem abbas et conuentus ius obtinent patronatus, prefatis officiis camere et infirmarie unire et incorporare de speciali gratia dignaremur. Nos igitur de predictis ut conuenit notitiam non habentes descretioni tue auctoritate qua fungimur presentium tenore committimus et mandamus, quatenus de predictis omnibus et singulis debite inquirens, si inueneris ea ueritate fulcita, nobis quam citius significare procures, ut certificari possimus, quid in huiusmodi negotio facere habeamus. Datum apud Nuemburgam, Patauiensis dioecesis, XV. Kalend. Septembris, pontificatus domini Clementis pape VI. anno octavo.

Source Fulltext: BURGER, Urkunden Altenburg (=FRA II/21, 1865) S. 227-228